Ki nongthep vote ki lah ban ujor lada don jingbakla ynda la pyllait ïa ki thup kyrteng: CEO

Shillong, Naiwieng 17 U Chief Electoral Officer ka Jylla u Dr. BDR Tiwari u la pynbna ïa ka Special Summary Revision of Electoral Rolls, 2027, yn pynmih ha ka 1 tarik Kyllalyng-kot 2027 kaba dei...

Shillong, Naiwieng 17

U Chief Electoral Officer ka Jylla u Dr. BDR Tiwari u la pynbna ïa ka Special Summary Revision of Electoral Rolls, 2027, yn pynmih ha ka 1 tarik Kyllalyng-kot 2027 kaba dei ka tarik kaba khatduh jong kane ka thup kyrteng, kumta la kyntu ïa man uwei pa uwei u nongshong shnong uba dei hok, ba kin peit bniah ïa ka kyrteng lada don jingbakla haba pynrung ïa ki kyrteng.

Ka Election Commis-sion of India, ha ka shithi jong ka ha ka 16 tarik u Naiwieng 2026, ka la buh ïa ka por katkum ka Section 21 jong ka Repre -sentation of the People Act, 1950, ban pynkhreh ïa ki thup kyrteng kiba thikna, kiba la pynthymmai bad kiba kynthup lang, da kaba pynleit jingmut kyrpang ïa ki nongthep vote kiba la sahkut, ki nongthep vote kiba dang khie samla bad ki nongthep vote kiba thymmai.

Ïa ka Integrated Draft Electoral Roll yn sa pynmih ha ka 1 tarik Nohprah, 2026, bad ki nongshong shnong ki lah ban thep ïa ki jingdawa bad ki jingpyrshah naduh ka 1 tarik Nohprah haduh ka 31 tarik Nohprah, 2026. Ïa ki jingdawa yn sa pynbeit noh hapoh ka 14 tarik u Kyllalyngkot 2027, bad ïa ki thup kyrteng ba khatduh yn pynmih ha ka 20 tarik Kyllalyngkot 2027.

Shwa ïa kata, ïa ka jingpynbeit ryntih bad pynbeit thymmai ïa ki jaka thep vote yn pyndep ha ka 23 tarik mynta u bnai, 2026, hadien ka jingpynshisha, ka jingbishar bniah ïa ka jinglah ban ïoh bad jingsuk, bad ka jingithuh ïa ki jaka kiba donkam ïa ki jaka thep vote kiba thymmai ne pynbeit thymmai. Ki jaka thep vote kim dei ban don palat ïa ka 1,200 ngut ki nongthep vote, bad ki nongthep vote kim dei ban ïaid palat ïa ka ar kilomitar ne ban ïaid lyngba ïa ki jingeh jong ka mariang ban poi sha ki. Ïa kane ka jingpynkhreh la leh da kaba ïamir jingmut bad ki seng saiñ pyrthei kiba la ithuh.

Ki nongshong shnong kiba la dap 18 snem ha lane shwa ka 1 tarik Kyllalyngkot, 2027, bad kiba pyndep ïa ki kyndon ban ïoh rung, ki lah ban aplai ban pynrung kyrteng. Ki nongthep vote kiba dei hok ki ban dap 18 snem ha ka 1 tarik u Ïaïong, 1 tarik u Jylliew ne 1 tarik u Naitung bad 1 tarik u Risaw 2027, ki lah ruh ban phah lypa ïa ki aplikeshon, ïa kiba yn sa pyntreikam ha ki jaka ba dei hok ban thep vote.

Ïa ki aplikeshon lah ban thep online lyngba ka Voters’ Services Portal bad ka ECINET Mobile App, lane offline lyngba ki Ophisar ba dei peit ïa ki nongthep vote, ki Assistant Electoral Registration bad ki Booth Level Officer. Ka phorm 6 ka long na ka bynta ban pynrung kyrteng, ka phorm 6A na ka bynta ki nongjied nongmihkhmat na India kiba don shabar ri, ka phorm 7 na ka bynta ban pyrshah ban pynrung ne pyndam, bad ka phorm 8 na ka bynta ban pynkylla jaka sah, ban pynbeit ïa ki jingtip ba kyrpang, ban bujli ïa ka EPIC bad ban buh dak ïa ki briew kiba don jingduna ha ki dkhot met. Ka jingai ïa ki jingtip ba bniah shaphang u Aadhaar ka long ka mon sngewbha, bad yn ym kyntait ïa kano-kano ka aplikeshon tang namar ka jingbym ai ïa u Aadhaar.

U Tiwari u la ong ba yn pynleit jingmut kyrpang ïa ki samla bad ki nongthep vote ba nyngkong eh, ki kynthei, ki riew rangbah, ki briew kiba don jingduna ha ki dkhot met, ki briew ki bym don ïing don sem, ki nongbylla sngi bad kiwei-kiwei ki bynta kiba rit paid. Yn buh ïa ki jaka ai jingïarap ha ki kyrdan distrik bad Assembly konstitwensi, bad lah ban pynlong ïa ki camp pynrung kyrteng kyrpang ha ka por ba don ki jingdawa bad jingpyrshah.

Ki seng treimon sngewbha kiba la ithuh na ka Ri bad ki Jylla kin don bynta bad ka jingpyntreikam ha ki kyrdan jong ka Jylla, Distrik bad konstitwensi, bad la bthah ban thung ïa ki Booth Level Agent ha kano-kano ka jaka ba ym pat thung bad ban ïarap ban ithuh ïa ki nongjied kiba dei hok kiba dang hap ban pynrung kyrteng. Yn ïasam ïa ki thup jong ki jingdawa bad ki jingpyrshah bad ki man la ka taïew, bad yn ai kopi jong ki draft bad ki roll ba khatduh katkum ba la bthah.

Haba kyrpad ïa ki nongshong shnong ban pynshisha ïa ki kyrteng bad ki jingtip ba kyrpang jong ki ynda la pynmih ïa ki draft roll ha ka 1 tarik u Nohprah bad ban ujor ïa ki jingdawa ne jingpyrshah hapoh ka por ba la buh, u Tiwari u la pan ruh ïa ka jingïatreilang na ki seng saiñpyrthei, ki seng bhalang, ki jaka pule, ki bor synshar shnong bad ki Rangbah Shnong.