Shillong, Naiwieng 17
Ka Khasi Students’ Union (KSU) ha ka Lah Sngi U Blei ka la kynthoh ba lada don ki jingjia ba shah kynnoh ki dkhot ka seng ki bor jong ka aiñ ki shim kam kloi-kloi, katba haba ïadei ka jinglap ka seng ïa ka jinglum pisa be-aiñ ki pulit ïa ki trok kit marbam ha Thangshalai bad Mawkhanu ka jingtohkit ka dang sdang hadien shibnai tam.
Haba kren sha ki nongthoh khubor u General Secretary ka Union u Samla Reuben Najiar u la ong ba haba ïadei ka jingjia ha ka 30 tarik u Risaw 2026, ka District Administration ka la pynlong da ka Magistrate Inquiry ban pynlong ïa ka jingtohkit kaba bniah haba ïadei katei ka jingjia.
U la pynkynmaw ba ka KSU ha ka 30 tarik u Risaw 2026 ka la hiar sha ki artylli ki jaka kata ha Mawkhanu bad Thangshalai, u la ong ba ka jinghiar ki dkhot ka KSU ha kitei ki jaka ka long hadien ba ka seng ka la ïoh ïa kiba bun ki jingujor na ki paidbah ba kynnoh ka don ka jinglum pisa be-aiñ ki pulit.
“Na ka liang jong ngi haba ïadei kato ka jingjia ngim shym la treh ban ujor FIR, namar ngi sngewthuh ba ki pulit hi ki ban tohkit ïa ki pulit kan ym myntoi, ta ka daw ngi la thoh dorkhas sha ka Sorkar ba ka dei ban pynlong da ka jingtohkit kaba laitluid ïa kata kim shym la leh, hynrei ki la buh pat da kane ka Magistrate Inquiry” la ong u Samla Reuben.
U la ong ba ïa kane ka jingtohkit la lamkhmat da u Bah Peter Tremi Passah, MCS uba dei u Additional Deputy Commissioner (ADC) jong ka East Khasi Hills District bad kane la khot ïa ki dkhot ka KSU ha ka 16 tarik u Naiwieng ban ai ïa ki jingjubab bad ki sakhi sabut ba la ïoh lum haba ïadei bad ka jingjia.
“Ka jingjia ka dei naduh ka 30 tarik u Risaw, ka jingkhot ïa ka ‘Hearing’ ka la long hadien 45 sngi ba ki khot ïa ngi ban ai jingjubab bad ki sakhi sabut, borabor ngi ju ïohi ba da ka don ka jingjia pyrshah ïa ki dkhot ka KSU shimiet-shimiet ki la wan, hynrei haba ïadei ka jingtohkit bad ki pulit ka shim por ïa ki ban leh hadien 45 sngi” u la ong.
Haba ïadei ka jingong ka tnad pulit ba la sospon ïa ki pulit kiba don ha ka jingjia, na ka liang u Samla Reuben u la ong ba katto katne ngut ki pulit ki la trei biang ka kam jong ki, “Ngim shym sngewthuh ba kumno ki ïoh ban sdang biang ïa kam jong ki haba ka jingtohkit ïa ka jingjia kam pat dep” u la ong.
Haba ïadei kane ka jingtohkit Magistrate, u Samla Reuben u la kyntu ba kan pyndep kham kloi ïa ka jingtohkit ban khot kham kloi ïa ki pulit kiba donkti ha ka jinglum pisa ïa ki trok khnang ba ïoh kloi noh ïa ka jingbishar kaba bniah.
Haba bynrap u Samla Reuben u la kynnoh ba dang ha kine ki sngi ka KSU ka dang ïoh ki jingujor na ki paidbah ba kane ka jinglum pisa be-aiñ ka dang ïai bteng ha kitei ki jaka, “Na ka liang ka seng ngi maham, ngi kyntu ba ka Sorkar ka dei ban khmih bniah halor kane ka jingjia, namar ka jingkhrong pisa be-aiñ ki pulit ïa ki trok kiba kit ïa ki marbam ka ktah ïa ki paidbah” u la ong.
