Shillong, Naiwieng 17
U Myntri Rangbah ka Jylla Conrad K. Sangma ha ka sngi Ba-ar u la ong, ka Jylla ka thmu ban buh ïalade ha ka kyrdan kum ka Jylla AI ne ka AI Valley kaban wan jong ka ri India ha kaba yn sdang shwa ïa ka jingaikam ïa ki 125 ngut ha ka liang jong ka Artificial Intelligence kaba long ka sienjam jong ka jingsdang ban thaw ïa ka lad aikam lyngba ka jingpyndonkam ïa ki kor teknoloji na ka bynta ki samla ka Jylla.
Haba kren ha ka jingïalang plie ïa ka AI Job Fair ryngkat bad ka Shamrock AI, u Conrad Sangma u la ong ba katei ka dei shi bynta jong ka jingïohi jngai kaba u la shimkhia naduh u snem 2008 ban pynkylla ïa ka Shillong bad Meghalaya sha ka shlem IT.
U la ong, ka Jylla ha kine ki snem kala trei shitom ban tei ïa ki jingtei, ban saiñdur ïa ka sap ki samla bad ban tei ïa ka jingïadei bad ki nongïalam jong ki karkhana ban tei ïa ka jinglong jingman kaba biang ha ka liang ka teknoloji.
“Mynta, haba peit ïa ka jingsdang ïa ka jingïohi jngai ba kan wandur ka long kaei-kaei kaba sngewkmen bha,” u la ong.
U Myntri Rangbah u la ong, ka jingthmu ka Sorkar ka long ban pynlong ïa ka Meghalaya kaba lamkhmat kum ka jaka ka AI ha ka Ri, ka ban khring ïa ki kompani teknoloji kiba heh bad ban thaw ïa ki lad aikam aijam na ka bynta ki samla kiba napoh ka Jylla bad ïa ka thaiñ baroh kawei.
U la pynpaw ba ki 125 tylli ki kam ha ka liang ka AI ka dei tang ka jingsdang bad pynpaw ïa ka jingskhem jingmut ba ka jingïatreilang bad ki karkhana kiba khlain bad ka jingroi ki sap ki phong kan ïarap ha ka ban pynmih shuh shuh ïa ki lad ïohkam.
U Conrad u la ai khublei ïa ka Shamrock AI, Prolifics, ki karkhana kiba ïatreilang, ki jaka pule bad ka tnad IT ka Jylla halor ka kamram kaba kila leh ban pynlong ïa kane ka sienjam.
U la ong ba ka Sorkar ka kut jingmut ban tei ïa ka sawdong sawkun kaba ïadei bad ka teknoloji ban pynlong ïa ka Meghalaya ka jaka kaba khring ïa ki nongkynshew tyngka bad ka jingleh ïa ki kam kiba long thymmai.
