T.2 lak ka khusnam lahduh ka Sur Kynud Season 5

Shillong, Naiwieng 17 Ka Don Bosco Media Network ka la pynbna ba mynta ka kynti ka jingpynlong ïa ka ‘Ka Sur Kynud Season 5’ kan long na bynta baroh ki nongshong shnong jong ka thaiñ...

Shillong, Naiwieng 17

Ka Don Bosco Media Network ka la pynbna ba mynta ka kynti ka jingpynlong ïa ka ‘Ka Sur Kynud Season 5’ kan long na bynta baroh ki nongshong shnong jong ka thaiñ Shatei Lam-Mihngi jong ka Ri baroh kawei ym dei shuh tang na bynta ki nong Meghalaya kumba ju long baroh shi katta.

Haba pynbna ïa kane ha ka 17 tarik u Naiwieng, u Director jong ka Don Bosco Media, Fr. Michael Makri u la pyntip ba ïa kane ka jingïakop yn pynlong naduh ka 19 tarik u Nohprah 2026 haduh ka 31 tarik Kyllalyngkot 2027 ha Don Bosco Youth Centre, Shillong.

La pynbna ruh u/ka lahduh ha kane ka jingïakob kin ïoh ban khur ïa ka song pisa kaba haduh 2 lak tyngka ryngkat ka kabu ksiar ba kin ïoh pat ban aireng ha ki lympung ïakob kiba heh ha ka pyrthei kumba long ki nongjop ha ki jingïakhun kiba la dep. Nalorkata, la pyntip ba kin don ruh ki khusnam kitbok ïa ki hynñiew ngut kiba poi shaduh ka kylla kaba khatduh da ka song pisa kaba mar T.1,500.

La pynbna ruh ba ka bai pynrung kyrteng na ka bynta kane ka jingïakop ka long T.1,500.  Kumta kito ki samla kiba don jingthrang ban ïashim bynta ki lah ban pynrung kyrteng lyngba ka official website jong ka jingïakop, www.kasurkynud.online, lane ban leit beit sha ka Studio jong ka Don Bosco Youth Centre, Laitumkhrah, Shillong.

Ïa kane ka website la pynkhreh bad plie paidbah da ka Kong Camelia Doreen Lyngwa, MCS, Special Secretary bad Director jong ka Arts and Culture Department, Sorkar Meghalaya.

Ka Don Bosco Media Network ka khot sngewbha ïa ki kmie ki kpa, ki skul, ki kolej, ki nonghikai rwai, ki Balang bad ki kynhun samla ban ïarap ban pynshlur ïa ki samla kiba don ïa ka sap rwai ban wan shakhmat bad ïashim bynta ha kane ka jingïakop.

Ka jingthmu jong kane ka jingïakop kam dei tang ban pynmih ïa ki nongjop, hynrei ban ailad ïa ki samla ban pynroi ïa ka sap jong ki bad ban ïoh ïa ka jingithuh ha ki rynsan kiba kham heh.

Ha kajuh ka por, ka Don Bosco Media Network ka la pynbna ruh ïa ka DBMNTV Youth Icon Award, kaba thmu ban ai jingithuh ïa ki samla kiba la pynpaw ïa ka sap kaba kyrpang, ka jingtrei shitom, ka jingaiti lut bad ki kam kiba don jingmut na ka bynta ka imlang sahlang, kiba long ruh ki nuksa kiba bha ïa kiwei pat ki samla.

Shuh shuh la pynbna ba lyngba kane ka website kan long ka rynsan digital kaba ai lad ïa ki paidbah ban ïoh ïa ki jingtip shaphang ka jingïakop, ki rukom pynrung kyrteng, ki jingpynbna bad ki jingjop jong ki nongshim bynta ha ki snem kiba la dep.

Ha ki saw tylli ki season kiba la dep, kane ka jingïakop ka la pynmih ïa saw ngut ki nongjop kiba la ïoh ruh ïa ki lad ban mihkhmat ïa ka India ha ki rynsan international.

Ka Chevinia Lyngdoh Mawnai, kaba la jop ha ka season kaba nyngkong, ka la mihkhmat ïa ka India ha ka Vocal Star UK, ha kaba ka la khur ïa ka nam nongjop international.

Ha ka season kaba ar, ka Ellery D. Kharkongor ka la long ka nongjop bad hadien kata la register ïa ka na ka bynta ka Britain’s Got Talent.

Katba u Kitkupar Nongsiej, uba la jop ha ka season kaba lai, lyngba ka Don Bosco Media Network u la ïashim bynta ha ka World Championships of Performing Arts (WCOPA), kaba la long ha Las Vegas, USA, ha kaba u la khur lai tylli ki takma ksiar bad ar tylli ki takma rnong.

Ha ka season kaba saw, ka Shelevah N. Jyrwa, kaba 12 snem ka rta na Laimer, Upper Shillong, ka la long ka nongjop ha ka grand finale kaba la long ha ka 26 tarik Rymphang 2026. Ka Don Bosco Media Network ka la dep ruh ban register ïa ka na ka bynta ka America’s Got Talent bad Britain’s Got Talent, bad ka la pyndep ruh ïa ki audition jong kine ki jingïakop bad kan sa ïoh ïa ka result jong ka BGT ha ka 21 tarik Nohprah 2026 bad ïa ka result jong ka AGT kan ïoh ha u bnai Lber 2027.