Shillong, Naiwieng 17
Ka Hynñiewtrep Integrated Territorial Organisation (HITO) ha ka 17 tarik Naiwieng, 2026, ka la pynrem jur ïa ka jingkren u Bah Prestone Tynsong, Symbud Myntri Rangbah ka Jylla, kaba u la kynnoh ba ki nonghikai Deficit, ki dei kiba pynbam kruiñ ïa ka Jylla.
Haba kren sha ki lad pathai khubor, u Bah Donbok Dkhar, President u la ong ba ki nonghikai ki dei ki budlum kiba ai ïa ka jingnang jingstad bad kumta un hap ban panmab.
U la ong ruh ba ka seng ka ai ka jingkyrshan ba pura ïa ka jingïakhih jong ki nonghikai bad lada donkam, kin mih madan lang ban dawa ïa ka hok jong ki.
“U Symbud Myntri u dei ban pyrkhat ba balei u khot ïa ki nonghikai da ki kruiñ. Ki nonghikai kidei u budlum ban ai ka jingnang jingstad, khamtam ïa nga shimet la ai ka jinghikai ban pynnang pynstad da ki nonghikai,” u la ong.
“Ngi pynrem jur ïa kum kane ka jingkren bad u Bah Prestone u dei ban panmab mardor ïa ki nonghikai,” la ong u Bah Donbok.
U la ong ruh ba ka seng ka la dep phah ka jingthoh sha u Bah Prestone ban ong ba ka jingkynnoh ba ki nonghikai ki dei ki kruiñ ka jaidbynriew baroh kawei kam pdiang.
“Nga kwah ban buh jingkylli sha ka Sorkar MDA ba hato kum kane ka jingphah jinghikai jong phi sha ki MLA lane kita ki nongmihkhmat? Hato ki leit ban shah hikai sha London, ban kren beiñ bad kheiñ poh ïa ki nonghikai bad ki paidbah,” u la bynrap.
