Mynta yn shongthait ka Kong I.Nongrang na ka kam DGP

Shillong, Naiwieng 18 Ka Kong Idashisha Nongrang kaba bat kum ka Director General of Police (DGP) ka Jylla kan shongthait noh lashai ka sngi Palei bad na ka liang ka Sorkar Meghalaya kan aiti noh...

Shillong, Naiwieng 18

Ka Kong Idashisha Nongrang kaba bat kum ka Director General of Police (DGP) ka Jylla kan shongthait noh lashai ka sngi Palei bad na ka liang ka Sorkar Meghalaya kan aiti noh shwa ha u Additional Director General of Police (ADGP) ban shimti kum u Acting DGP.

Ïa kane la pyntip da u Symbud Myntri Rangbah ba khmih ïa ka tnad Kam Pohïing Bah Prestone Tynsong ha ka sngi Balang, haba kren shai ba kane ka jingpynbeit ba shipor kan ïai bteng tad haduh ban da dep ka jingjied ïa u DGP ba pura.

“Lashai janmiet ka DGP jong ngi Kong Idashisha Nongrang kan shongthait noh. Ka Sorkar kan aiti ha u ADGP bala trei slem bha ba un khmih ïa ki kam tad haduh ka por ba ngi la lah ban pyndep ïa baroh ki jingdonkam,” ong u Bah Prestone.

U la kren shai ba ka Sorkar kam lah satia ban ïaid lait ïa ki kyndon bala buh ha ka ban thung DGP ba thymmai, kaba hap ban ïaid katkum ka hukum ka Supreme Court bad ki kyndon na ka Union Public Service Commission bad ka Ministry of Home Affairs, nalor ki ain ka Jylla.

“Ban jied DGP ba thymmai, ki don shibun ki kyndon bad ki rule kiba hap ban bud kynthup ka hukum ka ïingbishar Supreme Court, ki kyndon ka UPSC bad ka MHA bad ki ain ka Jylla,” u la ong.

Halor ka jingbuh por ban pyndep ïa ka jingthungkam ba pura, u Bah Prestone u la kyntait ban ai kano-kano ka jingkular haba kdew ïa bun ki jingdonkam kiba hap ban pyndep.