Shillong, Naiwieng 18
Ki pulit ka Anti-Narcotics Task Force (ANTF) ka Jylla kila ïoh ban kurup haduh 130.61 gram u heroin ha ka jingkhynra ba la pynlong ha ki lai jaka ha Lum Survey ha ka sngi Ba-ar, kaba lam ruh sha ka jingïoh kem ïa ki lai ngut ki briew kiba donkti ha kane ka kam.
Halor ka jingtip ba don ki nongkhaïi droks ha katei ka thaiñ, ka ANTF mar mar ka la shimkhia bad phah ïa lai kynhun ban pynlong ïa ka jingkhynra ha kajuh ka por ha ki lai tylli ki jaka, bad kine ki kynhun kila ïoh ban kurup haduh 9 tylli ki synduk sabon ba don u heroin bad 128 tylli ki vials.
Ka jingkurup kaba heh duh kala wan na ka ïing u Jahiruddin, ha kaba la ïoh ban kurup haduh 9 tylli ki synduk sabon kiba don u heroin ba khia 110.34 gram.
Na ka ïingsah ka Jamela Khatun, la ïoh kurup ïa 63 tylli ki vials ba don u heroin kumba 10.10 gram, katba 65 tylli ki vials ba don u droks 10.17 gram la ïoh ban kurup na ka ïingsah ka Moriom Katun.
Ha kaba ïadei bad kane, ka ANTF kala register ïa ka ejahar pyrshah ïa kitei ki lai ngut ha Cantonment Beat House.
La ïathuh ruh ba kane ka dei ka sien kaba ar tang ha kine ki khyndiat taïew, kata shwa kane, ha ka 7 tarik Naiwieng, hadien ka jingïoh jingtip, ka ANTF kala pynlong ïa ka jingkhynra ïa ka ïing jong u Alim Uddin ha Lum Survey bad kala ïoh kurup ïa 2 tylli ki synduk sabon kiba don u droks ba khia 27 gram.
Ha ka kyrwoh khubor u Superintendent of Police ka ANTF Vikash Kumar u la ong, “Na kine ki ar tylli ki jingkhynra bala pynlong ha ka 7 tarik bad 17 tarik, haduh 157.61 gram u heroin uba shongdor kumba T.75 lak, la ïoh ban kurup bad ki briew kiba la kem ki long 5 ngut.”