Los Angeles:
U Steven Spielberg ula ai jingiaroh ia u Tom Cruise da kaba ong ba une u tyngshop ula kyntiew biang ia ka Hollywood hadien ba kane ka karkhana ka la mad ia ka jingduhnong naduh ba wan lynshop ka khlam ha kaba u Steven u sngew ba lada ym dei na ka Top Gun: Maverick ka Hollywood ka lah ban duhnoh ia ka nam bad burom jong ka.
U Steven ha kawei na ki jingwan shim bynta ula kren ruh ba u Tom Cruise ula pynkhie im biang ia ka Hollywood bad sngew ba ha kine ki snem ban wan kane ka karkhana kan sa kiew biang kumba long ha ki por ba la leit bad kyrmen skhem ba ki phlim ba itynnad yn shna bad pynmih.
Ka Top Gun: Maverick la pynmih bad pyllait paidbah ha u Jymmang 2022 bad kane ka phlim ka la kamai haduh $1.48 billion ha kylleng satlak ka pyrthei.
Ha shwa jong kane, ka Spider-Man: No Way Home ka long ruh ka phlim kaba la kamai bha bad kaba la wanrah nam bad burom na ka bynta ka Holly wood. Mynta u snem ka Maverick ka la shah jied ban iakhun ha ki 6 tylli ki kyrdan jong ka Oscars kaba kynthup ruh ka Best Picture.
