Mumbai:
U Akshay Kumar uba long uwei na ki Superstar ka Bollywood ula kren halor ka jingsngew diaw hadien ba bun ki briew ki la kynthoh ia u ha kaba iadei bad ka Canadian citizenship ha kaba une u tyngshop ula pynpaw ba wat lada la kha ia u ha Canada pynban ula heh la san ha India bad haduh mynta u da sngew ialade ba u long u nongshong shnong ba pura jong kane ka ri.
Ha ka jingwan pynbna ia ka phlim thymmai ka Selfiee u Akshay ula iathuh ba u da sngewsih shisha halor ka jingkynnoh jong kiba bun ba um dei u trai shnong jong kane ka ri bad teng teng u ju sngew long nongwei bha haba u pyrkhat halor kane.
Ha ka jingsngew ba shimet jong u Akshay, ka India ka dei ka ri kaba u da ieit tam ha ka jingim jong u bad dei ruh kane ka ri kaba la pynpawnam bad pynpaw pyrthei ia u kumne kumba u long mynta.
Une u tyngshop wat hadien ka jingkynthoh jong kiba bun ba um dei u trai shnong ka India pynban u leh bym suidniew ia kaba kum kane kaei kaei bad pyrshang ban pynleit jingmut beit tang ha ka kam ba u trei.
Haba iakren halor ki phlim nalor ka Selfiee ia u Akshay ngin sa iohi ruh ha ka Hera Pheri 3 kaba yn ak lang da u Suniel Shetty bad Paresh Rawal. Ia kane ka phlim yn pynmih da u Firoz Nadiadwala.
Une u tyngshop un sa shim bynta ruh ha kawei ka Biopic ha kaba ia kane yn pynmih ha kine ki bnai ban wan.Kum u tyngshop u Akshay ula kiew bha ha ka kam ba u trei bad kane baroh ka dei namar ka jingai jingkyrshan jong ki paidbah ia ki phlim ba u ak bad shim bynta.
