Los Angeles:
Ka Cameron Diaz hadien bun bun snem ka la wanphai biang sha ka kam ak phlim ha kaba kane ka puron ka sngew kumba ka jingkmen jingsngewbha ka la wan biang sha ka jingim jong ka bad ka da kmen shi katdei eh ba ka lad ka lynti ka la plie biang ia ka ban ioh ak bad shim bynta ha ki phlim Hollywood.
Ka Cameron kaba la 50 snem kan sa mih pyrthei biang da kaba ak bad u Jamie Foxx ha kawei na ki phlim ka Netflix ka ‘Back In Action’ ha kaba ki bahaiing hasem bad ki paralok kiba ka don ka Hollywood ki la ai ka jingkitbok ia ka ha kaba iadei bad kane.
Kane ka puron ka la iehnoh ia ka kam ak phlim naduh u 2014 bad kane ka dei ruh hadien ba ka la ioh ia ki khun ki kti. Ha ka jingshisha ka Cameron ka la shah tyrwa ban ak kumba katto katne ki phlim ha ki snem ba la leit hynrei ka la kyntait lut ia ki na ka daw ba ka kwah ban shim khia ban pynheh pynsan shwa ia ki khun.
