Mumbai:
Ka Deepika Padu kone kan sa long kawei na ki puron ka Bollywood ka ban ak ha ki 5 tylli ki phlim ba remdor bha mynta u snem bad ha u snem ban wan ha kaba lada kheiñ kyllum lang baroh ia kitei ki phlim kiba kan ak ki la kot sha ka 1475 klur.
Ka Deepika kaba la ak ha ka Pathaan bad u Shah Rukh kan sa shim bynta ruh ha ka Jawan ha kaba kane ka dei kawei na ki phlim ba la shna ha ka dor kaba rem bad kan long ruh ka phlim iashoh.
Kane ka puron kaba la rung ak phlim nyngkong eh sha Bollywood da kaba ak ha ka Om Shanti Om wat lada ka la mad jingduhnong ha ki katto katne ki phlim ba ka shim bynta pynban ki la don pat ki phlim kiba la iarap bha ban kyntiew ia ka kam ba ka trei bad kiba la pyn iohnong ruh ia ka.
Ka kaiphod ba la ioh ka iathuh ba ka Deepika wat lada kam shim la soi bun ki phlim kumba long kiwei kiwei ki puron pynban ki phlim kiba ka soi ki dei pat kiba remdor.
Kane ka puron kaba don ha ka thup jong ki puron ba ioh ia ka jing siew kaba heh ka dei ruh kaba la ioh ban pdiang bun tylli ki khusnam ha ka jingim jong ka bad iohpdiang haduh 3 sien ia ka Filmfare Awards For Best Actress.
Ki khubor ki pynpaw ruh ba lada baroh ki phlim ba ka Deepika ka ak mynta u snem bad ha u snem ban wan ki iaid bha kumba long ka Pathaan kane ka puron kan sa long kaba riewspah tam.
Ka Deepika ka ban wan shim bynta tang malu mala ha ka Jawan la iathuh ba ka bynta ba ka shim pat ka dei kaba kongsan bha. Kane ka puron kaba la ak ruh ha ka Fighter bad u Hrithik Roshan kan sa ioh ia ka jingsiew baheh na ka bynta kane bad ia ka Fighter la shna bad la pynlut haduh 250 klur.
Ha kajuh ka por ia ka Project K ba ka ak bad u Prabhas la shna ha ka dor kaba la kot sha ka 500 bad kane ka phlim yn pynmih haduh ki bnai ba pdeng jong u 2024.
Nalor jong kitei ki phlim ka Deepika ha u snem ban wan kan sa ak ruh ha ka bynta ba-ar jong ka Brahmastra kaba direk da u Ayan Mukerji.
Ha kajuh ka por kan sa shim bynta ha ka sien nyngkong ban ak lang bad u Ajay Devgn ha ka phlim jong u Rohit Shetty ka Singham 3.
