Mumbai:
Ka Alia Bhatt ka la long kawei na ki puron kaba la ioh ban rung ha ka thup jong ka Impactful International Women of 2023 bad nalor jong ka, ka Emma Thompson bad ka Rosalia ki la shah kynthup lang ha kane ka thup.
Ka Alia kaba la ak ha ka Brahmastra bad Gangubai Kathiawadi ka la khring ia kiba bun ki nongpeitkai lyngba ki phlim ba ka shim bynta bad na uwei u snem sha uwei pat kane ka puron ka la pynshoh jingieit ia ki paidbah da ki phlim thymmai jong ka.
Kane ka dei ka sien nyngkong na ka bynta ka Alia ban don kyrteng ha katei ka thup bad nalor jong ka ym shim la don kano kano ka puron ka Bollywood ban ioh rung.
Ka Alia kaba dang bun kam ban leit ak ia ka Rocky Aur Rani Ki Prem Kahani ka dei mynta kawei na ki puron kaba la pynshoh jing ieit bha ia ki nongpeitkai bad ka jinglong tbit jong ka ban shim bad ban ak ia kano kano ka bynta ha ki phlim ka dei kawei kaba la kyntiew bha ia ka kam ba ka trei.
Kane ka puron kaba la ak ha ki 3 tylli ki phlim ba iaid iew bha kiba kynthup ruh ka Gangubai Kathiawadi, RRR and Brahmastra ka la ioh jingiaroh na kiba bun hadien ba la pynbna ia ka kyrteng jong ka kum kawei na kiba la don ha ka thup jong ka Impactful Women of 2023 bad kane ka long ruh ka burom bakhraw ia ka ri hi baroh kawei.
Haba iakren halor ki phlim ia ka Rocky Aur Rani Ki Prem Kahani nalor ka Alia bad u Ranveer la ak ruh da u Dharmendra, Shabana Azmi bad Jaya Bachchan ha ki bynta ba kongsan. Ha kajuh ka por
ia kane ka phlim yn pynmih bad pyllait paidbah haduh u Naitung 28 tarik.
Ha kajuh ka por ka Alia kan sa ak ruh ha ka Jee Le Zaraa bad ka Priyanka Chopra bad Katrina Kaif bad ha kaba iadei bad kane ka phlim yn leit ban ring naduh ki bnai ban wan sha ki katto katne ki bynta jong ki ri ka pyrthei.
