Mumbai:
U Aamir Khan, Rajkumar Hirani bad Mahaveer Jain ki la pynpaw ïa ka jingsngewkmen halor ka jingplie biang ia ka Jammu and Kashmi na ka bynta ban wan ring phlim ha kaba kane kan sa ailad ia ki katto katne ki direktor ka Bollywood ban wan ring ia ki phlim thymmai jong ki sha kane ka jaka.
Hadien ba la khang noh ia kane ka jaka la bun bun snem mynta na ka daw jong ka jingdon ki lehnoh bad kumjuh ruh na kiwei kiwei ki daw khatduh eh mynta ka sorkar jylla ka la ailad biang ia ki nongring phlim ban sdang wan ring biang ia ki phlim jong ki sha Jammu and Kashmir khnang ban kyntiew biang ia kane ka jaka bad kum juh ruh ban khring biang ia ki nongwan jngoh kai pyrthei.
Naduh ba la khang ia ki phlim ban wan ring sha Jammu and Kashmir ka la don ka jingduhnong ba khraw bad dei ruh lyngba ki phlim ba ka Jammu and Kashmir ka la paw pyrthei bha bad bun ki nongshangkai ki la kwah ruh ban wan peit bad sakhi ia ka jingitynnad jong ka.
Ka Kashmir kumba la tip ka dei kawei na ki jaka ba itynnad tam ha ka pyrthei bad ka jingdon jong ki lum thah, ka suiñbneng kaba biang bad kiwei kiwei bun ki la shah khring bha ban wan iuhkjat ia ka.
Lehse mynta u snem ka Kashmir kumba long ha ki por mynshwa kan sa kiew bha ha ka ioh ka kot da ka jingwan ring phlim bad kumjuh ruh da ka khajna ba ka iohlum bad kiwei kiwei.
Lehse kan long ruh kaei kaei kaba pynkmen ia ki khlur ak phlim ki bym pat ju iohlad ban wan iuhkjat ha kane ka jaka ban ioh wan ak phlim.
