Los Angeles:
U tyngshop ka ‘Ghost Rider’ u Nicolas Cage ula kren halor ka jingbym kwah jong u ban ak bad ban don bynta ha ki phlim ka Marvel ha kaba u Nicolas u sngew ruh halade shimet ba ki phlim jong kiwei kiwei ki kompani ki biang ruh na ka bynta jong u.
Une u tyngshop uba la don 59 snem uba ka kyrteng trai ka dei u Nicolas Coppola u dei u pyrsa jong u direktor ka ‘The Godfather ‘u Francis Ford Coppola u sngew ba wat lada bun ki iabeh ban ioh ak ha ki phlim ka Marvel hynrei na ka bynta jong u kam long satia kumne.
Ha ka jingai jingkren ha ka Variety Legend and Groundbreaker Award kaba la long ha Miami Film Festival, u Nicolas u sngew ba ki phlim ka Marvel kim don kawei ruh ka ban khring ia u bad dei na kane ka daw ba um ju kwah ban ak ha ki phlim katei ka kompani.
Ha kajuh ka por u Nicolas u sngew halade shimet ba um donkam ia ki phlim ka Marvel ban pynpaw pyrthei ha kaba kiwei kiwei ki phlim ba la pynmih da kiwei pat ki kompani ki la iarap shisha ia u ban ioh ia ka jingithuh na kiba bun.
Ha ka jingiaid lynti jong u kum u khlur ak phlim u Nicholas ula shim bynta ha ki katto katne ki phlim ba itynnad bad wat haduh mynta bun hi na ki phlim ba u ak ki dang lah ban khring ia ki nongpeitkai.
Shuh shuh mynta u snem ia une u tyngshop ngin sa iohi ha kawei ka phlim thymmai ha kaba ula ak ia ka bynta kum u Dracula.
