Hyderabad:
U Ram Charan hadien ba u la khring ia kiba bun lyngba ka phlim ba u ak, ka RRR mynta la mih khubor ba une u tyngshop un sa pynkhreh noh ban rung ak phlim ha Holly wood da kaba shah tyrwa ban don bynta ha kawei ka phlim bad ka khana jong ka, ka long kaba biang bad kaba u da sngewtynnad eh.
U Ram ha ka jingwan shim bynta ban ai jingkren sha ka American Media ula kren halor ki phlim bad kumjuh ruh ki phlim kiba la pynmih na India bad sngewkmen ba ki karkhana pynmih phlim na India kim shim long sahdien shuh bad ki la sdang kiew katba dang iaid ki snem.
Une u tyngshop uba la shah sin kum u ‘Brad Pitt of India’ un sa pynbna shen ia ka kyrteng jong ka phlim Hollywood ba un ak bad kum u tyngshop u Ram u thrang ruh ban ioh ia ka lad ban ak phlim ryngkat bad ka Julia Roberts, Tom Cruise bad kumjuh ruh u Brad Pitt.
Kumba long kiwei kiwei ki khlur ak phlim na India u Ram ruh un sa iohlad ban shim bynta ha ki phlim Hollywood bad katno kan long ka burom bakhraw na ka bynta ka ri hi baroh kawei.
U Ram mynta ula don ha US ban leit shim bynta ha ka Oscars Award ha kaba ka jingrwai na ka phlim RRR ka la shah jied ban iakhun ha ka kyrdan Best Original Song.
Ha kajuh ka por ia une u tyngshop ngin sa iohi ha ka phlim thymmai bad ka Kiara Advai ka RC 15 kaba yn sa pynmih bad pyllait paidbah noh mynta u snem.
