Los Angeles:
Ka jingrwai na ka phlim RRR ka Naatu Naatu sa shisien ka la wanrah nam bad burom ia ka ri hadien ba kane ka jingrwai ka la rah ia ka Best Original Song ha ka Oscars Awards kaba la pynlong ha ka sngi u Blei.
Naduh ba la pynbna ia ka kyrteng jong kane ka jingrwai kum kawei na kiba la shah jied ban iakhun ha ka Oscars ha ka kyrdan Best Original Song bun ki khmih lynti ba kane ka jingrwai kan ioh ban rah ia ka Oscars kumba long ha ka Academy Awards kaba dang shu dep ban pynlong shen.
Ka jingiohrah ka Naatu Naatu ia ka nam Best Original Song ha ka Oscars kan sa pynsah kynmaw ia baroh khamtam lei lei ia ki nongshong shnong ka India naba ym pat ju don kawei ruh ka jingrwai na kane ka ri ka ban shah jied ne iohpdiang ia ka Oscars.
Ha ka kyrdan Best Original Song kiwei kiwei ki jingrwai na ki phlim kiba la shah jied ban iakhun lang ki long ruh ka Applause (Tell It Like a Woman), Hold My Hand (Top Gun Maverick), Lift Me Up (Black Pather Wakanda Forever) bad This is a Life (Everything Everywhere All at Once).
Ia ka Naatu Naatu la thaw da u MM Keeravani bad la rwai da u Rahul Sipligunj bad Kaala Bhairava bad ka phlim RRR ka dei kaba direk da u SS Rajamouli.
Ia ka jingrwai Naatu Naatu la shad da u Ram Charan bad Jr NTR bad kane ka jingrwai la pyntem ha kylleng ki jaka khamtam lei lei ha ki jaka ba don ki khawai dawai.
Ia ka Oscars la pynlong ha Dolby Theatre kaba ha Los Angeles bad la wan ban shim bynta da kiba bun ki khlur ak phlim ka Hollywood.
Hadien 13 snem ka Naatu Naatu ka la wanrah nam bad burom biang ia ka ri da kaba iohrah ia ka Best Original Song bad ha ki snem ba la leit kawei na ki jingrwai ba la rwai bad thaw da u AH Rahman ruh ka la wanrah burom ia kane ka ri da kaba iohpdiang ia ka Oscar bad kane ka dei na ka phlim Slum dog Millionaire.
