Mumbai:
U Lawrence Bishnoi sa shisien u la byrngem biang ia u Salman Khan ba u dei ban panmap halor ka jingsiat jong u ia ki Blackbuck ne kynja sier kiba dei ki mrad kiba kheiñkor tam ha Rajasthan. U Lawrence u la dawa ba lada u Salman um shym sngap ia kane ka jingbthah jong u un sa dkhat jubor ia ka jingim jong u kumba leh ia u Sidhu Moosewala.
Kane ka dei ka sien balai ba u Salman un shah byrngem ha u Lawrence Bishnoi uwei na ki runar uba la donkti ha kiba bun ki kam pyntriem ha ki snem ba la leit.
La iathuh ba ka jingpyniap u Salman ia ki Blackbuck ka da ktah bha ia ki nongshong shnong ka Rajasthan bad une u tyngshop ula shong patok teng tang na ka daw jong kane.
U Lawrence Bishnoi uba long ruh uwei na ki nongialam ka Bishnoi Gang ula pynpaw ka jingbitar halor ka jingsngap jar u Salman haduh mynta halor ka jingbthah jong u ba u dei ban leit panmap na kawei ka Temple kaba don ha Rajasthan halor kane ka jingleh jong u.
Ka jingleh bym suidniew jong u Salman ka la pynlong ia u Lawrence ban byrngem tyngeh syndon ia u da kaba ong ba u lah ban mad ia kajuh ka jingjia kumba long ia u Sidhu Moosewala ha u snem ba la leit.
Wat lada la 9 snem mynta u Lawrence Bish noi u dang don hapoh patok halor ki kam bymman ba ula leh pynban ki nongbud jong u ki dang bteng ban leh ia ki kam kiba ula phah bad ban syntiat ruh ia u Salman.
U Lawrence Bishnoi lem bad ka kynhun jong u ki la dkhat jubor ia ki jingim jong ki katto katne ha kine ki snem ba la leit bad kane ka dei ruh tang namar ka jingbuh shun bad ha kajuh ka por ka jingkynad.
