Hyderabad:
U Ram Charan, uba long mynta uwei na ki tyngshop ba paw bha jong kane ka ri hadien ka jingwanphai na Los Angeles ula shah kylli jingkylli ha ki nongthoh khubor halor kumno u sngew hadien ba ka Naatu Naatu ka la iohrah ia ka Best Original Song ha kaba u Ram ula pynpaw ba kane ka long kaei kaei kaba baroh ki dkhot jong katei ka phlim ki ap khmih lynti bha bad sngewkmen ruh halor kane.
Ha kajuh ka por ki nongthoh khubor ki la buh jingkylli ruh ia u Ram halor kaei ka phlim kaba u kwah ban ak hadien habud ha ka jingim jong u bad ka jubab kaba ula ai ka long ba u kwah ban ak ha ka Biopic jong u Virat Kohli lada shna ne pynmih ia ka.
Nalor kane, u Ram u kwah ruh ban ioh ak phlim lang bad u Salman Khan bad shim ruh ia utei u tyngshop kum uwei na kiba u itynnad tam.
Une u tyngshop uba ngin sa iohi ha ki katto katne ki phlim thymmai kiba kynthup ruh ka RC 12, u long mynta u khlur ak phlim uba la khring ia kiba bun ki nongshna phlim bad direktor bad shen ngin sa iohi ruh ia u ha ka phlim Hollywood.
Une u tyngshop uba dei ruh u khun jong u Chiranjeevi ula ioh ban ak teng ha kawei ka phlim Bollywood bad ka Priyanka Chopra hynrei kane ka phlim kam shim lah ban khring ia ki nongpeitkai naba ka khana kam da long than kaba itynnad haduh katta katta.
Dei ruh hadien jong kane ba ula shim ia ka rai ban pynleit jingmut noh tang ha ki phlim Tollywood kiba la plie lad ruh na ka bynta ka jingim jong u bad iadei kam ruh bad ki katto katne ki nongpynmih phlim bad direktor ba kynsai jong katei ka karkhana.
