Los Angeles:
Ka Cameron Diaz kaba la shim ia ka rai ban mih pyrthei biang ha ka kam ak phlim la ioh khubor ba kane ka puron ka lah ban kiar noh syndon na kane ka kam ha kaba lehse kan ym wanphai shuh syndon sha ka kam ba ka trei.
Ka Cameron kaba la kiar na ka kam ak phlim naduh u 2018 ka la rai ban mih pyrthei biang mynta u snem hadien ka jingshah pynbor ha u paralok ba iajan bad ka u Jamie Foxx. Hynrei mynta pat la ioh khubor ba kane ka puron ka lah ban nym wanphai shuh sha ka kam ak phlim bad iehnoh syndon ia ka.
Ha ka jingshisha ka Cameron kam da sngew don mon shuh ban ak phlim naba ka kwah ban shim khia ban pynleit jingmut ha kiwei kiwei ki kam ba ka sngewtynnad bad kumjuh ruh ban ri ban sumar bad ban peit ia ki khun ki kti.
La ong ba ka Cameron ka sngewthuh shai ba lada ka leitphai sha ka kam ak phlim kan ym don por shuh ban peit bad ban sumar ia ki khun ki kti bad kane ka lah ban wanrah jingeh pynban ia ka.
Kum ka puron ka Cameron ka la ak bad shim bynta ha ki katto katne ki phlim ba itynnad kiba kynthup ruh ka There’s Something About Mary, Charlie’s Angels, Gangs of New York, The Holiday, bad kiwei kiwei.
