Mumbai:
U Ranveer Singh ula knieh noh ia ka nam kum u India’s ‘most valued celebrity’ na u Virat Kohli ha kaba kane ka long hadien ba une u tyngshop ula kamai haduh 181.7million dollars tang na ki byrta ba u pynbna.
Ha ka Top Ten jong ka India’s ‘most valued celebrity’ kiwei kiwei kiba la don kyrteng ki kynthup ruh ia ka Alia Bhatt bad ka Deepika Padukone kiba long ki puron kiba don bun bha ki byrta ban pynbna katba dang iaid ki snem.
Wat lada u 2022 um shim long satia u snem uba biang na ka bynta u Ranveer hadien ka jingbym iaid jong ki phlim ba u ak kiba kynthup ka Cirkus bad Jayeshbhai Jordaar pynban ula iohnong bad ioh jingmyntoi pat ha kawei ka liang ha kaba bun ki kompani ba paw ki la thung ia u kum u nongrah ktien bad kum u nongpynbna ia ki tiar ki tar ba la pynmih.
Katkum ka Kroll’s Celebrity Brand Valua tion Report 2022 u Ran veer ula long u ‘India’s Most Valued Celebrity of 2022’, ha kaba ula kamai bad iohnong bha na ki byrta ba u pynbna kaba long ka jingiarap bad jingmyntoi ia u.
Une u tyngshop mynta u snem ula knieh noh ia ka kyrdan banyngkong na u Virat uba la bat haduh 5 snem kynthih ia kane. Kiwei kiwei ki khlur ak phlim kiba la don kyrteng lang ha katei ka thup ki long ruh u Akshay Kumar, Shah Rukh Khan, Amitabh Bachchan bad u Hrithik Roshan.
Ha kaba iadei bad ka India’s ‘Most Valued Celebrity’ ym tang ki khlur ak phlim kiba la don kyrteng ha kaba wat ki khlur ialehkai ba pawnam jong kane ka ri ruh ki la don kyrteng lang.
U Allu Arjun bad ka Rashmika Mandanna ruh ki la don kyrteng ha ka thup‘Most Valued Celebrity’ ha kaba u Allu ula bat ia ka kyrdan ba 20 bad ka Rashmika pat ba 25.
