Los Angeles:
U Weeknd u la ioh ban rung ha ka Guinness World Record kum u nong-rwai uba pawnam tam ha ka pyrthei ha kaba une u nongrwai uba la kha ha Toronto u la don haduh 111.4 million ki briew kiba sngap ia ki jingrwai jong u ha Spotify bad u dei ruh u nongrwai uba nyngkong ban don haduh 100 million ki nongsngap ia ki jingrwai jong u.
Ka kaiphod ba la ioh ka iathuh ba ym pat ju don uno uno u nongrwai u ban long kumba long u Weeknd bad une u nongrwai ula jam bad iaid sha khmat ban khring ia kiba bun ban sngap ia ki jingrwai jong u bad iehnoh shadien ia ka Miley Cyrus kaba don kumba 82.4 million ki nongsngap ia ki jingrwai jong ka bud sa ka Shakira (81.6 million), Ariana Grande (80.6 million), Taylor Swift (80.2 million), Rihanna (78.5 million) bad Ed Sheeran (77.5 million).
U Weeknd uba ka kyrteng ba pura ka dei u Abel Makkonen Tesfaye la kha ha ka 16 u Rymphang, 1990 ha Toronto, Canada bad ula sdang ban paw pyrthei naduh u 2010.
Kum u nongrwai u Weeknd ula pynmih buh tylli ki thup jingrwai ba iaid bha jong u kiba long ruh ka Starboy, Beauty Behind the Madness bad After Hours.
Kum u nongrwai u Weeknd ula ioh ban rah haduh 4 sien ia ka Grammy Awards, 20 tylli ki Billboard Music Awards,6 tylli ki American Music Awards bad kiwei kiwei.
Ha kajuh ka por u la shah jied ruh sha ka Academy Award bad Primetime Emmy Award.
