Nongstoiñ, Lber 26:
Ka jingïai bteng jong ka jingïap ki ngap na ka por sha ka por bad na kawei ka jaka sha kawei pat ha ki bynta jong ka West Khasi Hills District ka la long shisha jingduhnong kaba khraw ïa ki nongri ngap kiba im sngi da kane ka kam.
Katei ka jingïap ki ngap ka la jia ruh ha kawei na ki shnong ha Khliehmawlieh, West Khasi Hills ha kaba ha kine ki sngi, ki ngap kiba ki nongri ki la ri ki la shu ïap la ka ïap hi bad kane ka la pynlyngngoh shi kat dei ïa ki nongri ngap nalor ba ki la hap ban duh noh ïa ki ngap kiba ki la ju ri baroh shi katta.
U Bah Klestar Syiem, uwei na ki ’riew rangbah na ka shnong Khliehmawlieh uba dei ruh u nongri ngap naduh ki por ba u dang khynnah, u la pynpaw ka jinglyngngoh namar watla naduh ba u dang rit u ju ri ngap, hynrei um pat ju lap kumba long mynta u snem ha kaba tang shu rang u slap, shi sngi ar sngi hadien, ki ngap ki la shu ïap la ka ïap hi.
“Nga dang mutdur ba u ïap thngan ne kumno, hynrei haba nga peit ïa ki rew ngap kiba don shapoh jong ka ksing, ka um ngap ruh ka biang ka ja jong u ngap ruh ka biang bad ka jingbam jong u ngap ka dang biang lut, hynrei u shu ïap la ka ïap bad kane ka pynlyngngoh haduh katta-katta ïa nga bad ngam lah ban sngewthuh na kaei ka daw ba ki ïap,” la ong u Bah Syiem.
U la ïathuh ruh ba u la pyrshang ban wad jingtip, hynrei ym shym la ïoh jingtip eiei halor katei ka bynta.
U Bah Syiem u la ong ruh kat haduh mynta ki don kumba 7 ksing ki ngap ki jong u kiba la ïap bad u dang don sa kumba 13 tylli ki ksing bad imat kitei kiba dang don ruh kin sa ïap lut namar ki don ki ksing kiba ki ngap ki la sdang ban ïap.
U la ong ruh ba kum u nongri ngap u shem jingeh haduh katta-katta kumno ban ïada ïa ka jingïap jong ki ngap bad lehse ka shong sa ha ki bor sorkar ba kin ai lem ka jingpynshai sha ki nongri ngap da kano ka lad ban ïada ïa ka jingiap jong ki ngap.
U la ong ruh ba u la mutdur ba lehse ka jingïap jong kitei ki ngap ka lah ban dei na ka jingbakla jong ki syntiew kiba u thung, ïoh ba ki ai dawai kumno-kumno ki khun. Hynrei haba pyrshang ban kylli pat ym shym la don mano-mano ba ai dawai.
“Ha ka jingim jong nga kum u nongri ngap, ngam pat ju ïohi mynno-mynno bad baroh shi katta nga ju ïohi ba ha kiwei ki jaka ki la jia ba ki ngap ki ïap. Nga dang mut ba ki don jingbakla kumno-re-kumno na kaba ai dawai ïa ki jingthung-jingtep lane ki dei kino-kino ki kynja dawai hynrei kumba long mynta, ha katei ka jaka jong u, ym don eiei ba pyndonkam ban ai dawai hynrei ki la shu ïap,” u la ong.
Haba ïakren halor ka kam ri ngap jong u, u la ong ba na kawei-kawei ka ksing, u ju sei ïa ka um ngap kumba lai sien ka um ngap ha ka shisnem bad na kawei-kawei ka ksing ngap u ju ïoh kumba hynriew kilo bad u don kumba 16 ksing.
Kumta ka jingïoh ha ka shi snem ka poi sha ki phew hajar tyngka, hynrei katei ka jingïap jong ki ngap ka la long shisha ka jingduhnong kaba khraw ïa u namar mynta lei-lei tang ban ïoh ïa u ngap ban ri ruh ka long kaba jynjar.
Na ka liang u Bah Syiem u la kyntu jur ïa ka Sorkar lyngba ki tnad ba dei peit, ba ka donkam ban leh da kino-kino ki kynja ai jinghikai lane pynshai kaba ki nongri kin long kiba la tip janai namar haduh mynta bun ki nongri ngap ki shu ri lymmuh.
