Shillong, Nailur 08
U Lamphang ka ïingdorbar thawaiñ ka Jylla u Thomas A Sangma u la rai ban bteng ban ithuh ïa u MLA ka North Shillong Bah Adelbert Nongrum kum u dkhot ka Voice of the People Party (VPP) haba pynpaw ba ka shithi sospon, kam dei kaba la phah sha u kum u MLA.
“Nga la ïoh pdiang ïa ka shithi (sospon). Ka dei ka jingshisha ba u la shah sospon na ka seng hynrei ngam lah pat ban pdiang ïa ka naba ka shithi sospon bala phah sha nga, la phah sha u Bah Adelbert Nongrum, tang kum u Adelbert Nongrum (Jaiaw). Ki lah ban don bun ki Adelbert Nongrum kiba sah ha kajuh ka shnong,” ong u Thomas haba ïakren bad ki lad pathai khubor hadien ba la wai ka dorbar ha ka sngi Nyngkong.
Haba kylli, u Thomas u la ong, “Kumba nga ong, u dang dei shibynta jong ka VPP Legislative Party. U la shah sospon bad ïa kane la pyntip ruh sha ngi hynrei ka shithi sospon kam shym la pynpaw ïa u kum u MLA. U la shu shah sospon tang na ka seng, ym na ka Legislative Party. Kane ka dei kaba ngi sngew. Ta ka daw u dang dei hi u dkhot ka VPP Legislative Party”.
Hynrei, u Lamphang u la pynpaw ba u Bah Adelbert u la wanrah ïa kane ka kam hapoh ka ïingdorbar khlem da ïaid katkum ki lynti ba dei ban ïaid, naba u khlem kdew ïa kano kano ka ‘point of order’.
U Lamphang u la pynpaw ba katba u Bah Adelbert u don ïa ka hok ban rah jingkylli kum u nongmihkhmat ba jied u paidbah, u dei pat ban ïaid katkum ki lynti kiba la buh.
U Lamphang u la khot ïa u Bah Adelbert sha ka kamra jong u ban ïakren bad pynbeit ïa kane ka kam.
U la pynpaw ruh ba ka jingpynkynriah ïa ka jaka shong jong u Bah Adelbert ka lah ban dei ka jingleh bakla jong ka Assembly Secretariat.
Haba shim ba u Bah Adelbert u dang dei u dkhot ka VPP Legislative Party, u Lamphang u la bthah ba dei ban buh biang ïa ka jaka shong u Bah Adelbert ha ka jaka bala ai nyngkong.
