Shillong, Nailur 08
U MLA ba la shah sospon jong ka Voice of the People Party (VPP) ba don ha ka Liang Pyrshah u Bah Adelbert Nongrum, u la pynpaw ïa ka jingbym sngewtynnad bad buh jingkylli hapoh ïingdorbar ba ïadei bad ka jingshah sospon ha ka seng.
U Bah Adelbert uba mihkhmat ïa ka North Shillong Konstitwensi, u la buh jingkylli ba balei u shah kyntait sharud watla u dei u MLA ka VPP.
Une u MLA u la shah sospon ha ka 24 tarik Lber, 2025 halor ka jingkynnoh ba u leh ïa ki kam kiba long pyrshah ïa ka seng.
Ha ka sngi sdang jong ka Dorbar Synrai ha ka sngi Nyngkong, u Bah Adelbert u la pyrshang ban buh jingkylli da kaba ong, “Nga lah ban pan jingshai balei ba ma nga kum u MLA ka VPP nga hap ban mad ïa kane. Balei ba phi phah shong ïa nga sha ka shuki ba hadien duh”.
Haba u Lamphang ka ïingdorbar thawaiñ u Thomas A Sangma u kylli ba hapoh ka rule aiu ba u buh ïa kane ka jingkylli, u Bah Adelbert u la pynshai ba u khlem buh satia ïa ka jingkylli hynrei u pan jingpynshai halor ka jingshah sospon jong u.
U la ïasaid ba ka jingsospon ïa u, ka dei kaba ‘long beaiñ’ bad ong “Ki (VPP) kim shym la thoh sha nga kum u MLA ka North Shillong (ha ka shithi sospon) hynrei kila thoh sha nga kum u Adelbert Nongrum, Shillong”.
Halor kane, u Lamphang u la kular ba un sa khmih ïa kane ka kam.
“Ïa kane ka kam yn sa ïakren kham hadien ha ka kamra jong nga,” ong u Thomas haba pynpaw ba ka por kam ïahap satia ban ïakren ïa kane ka kam hapoh ka ïingdorbar.
