Shillong, Nailur 08
Ka nongmihkhmat ba dang shah jied thymmai na Gambegre, ka Dr. Mehtab Chandee A. Sangma, kaba dei ruh ka kurim jong u Myntri Rangbah ka Jylla, u Conrad K. Sangma ha ka Lah Sngi U Blei ka la wan sha Ïingdorbar Thawaiñ, kaba long ruh ka sngi sdang jong ka Dorbar Synrai.
“Ka long ka kabu bad ka burom ban mihkhmat ïa ka konstitwensi jong nga,” la pynpaw ka Dr. Mehtab haba kren sha ki nongthoh khubor hadien ba la wai ka Dorbar.
Kum ka dkhot ba-thymmai jong ka Ïingdorbar, ka la pynpaw ba ka dang pule bniah haba ïadei bad ki rukom trei-kam jong ka Ïingdorbar. Ka thmu ban peit bniah khnang ban ïoh ka jingshemphang hashuwa ban ïashim bynta shitrhem ha ki kam jong ka Ïingdorbar.
“Kumba ka long, ha kane ka kynti nga dang don shibun kiei-kiei kiba nga hap ban tip. (Ngan) dang peit bniah ïa ka rukom treikam bad kumno la pynïaid ïa ka Ïingdorbar, bad kumta nga pyrkhat ba ngan peit bniah bha shuwa bad lehse ha ka sien kaba bud, nga la tikna,” la ong ka Dr. Mehtab.
Halor ka phang ba ïadei bad ka jingmihkhmat jong ki kynthei ha ka saiñ pyrthei, ka la ong “Kumba ka long, ngi ju ïohi ba ka jingmihkhmat jong ki kynthei ha ka saiñ pyrthei ka ju long barabor kaba duna bha bad nga sngew burom shibun hangne mynta ka sngi – kum ka kynthei bad ban don lang ha kane ka ïing bad nga kyrmen ba da ka jingdonlang jong nga hangne, kin sa nang bun shuh ki kynthei ki ban ïoh mynsiem ban pynïasoh sha ka saiñ pyrthei.”
Ka Dr. Mehtab ka la shah jied ha ka ilekshon shiteng samoi kaba la long ha u bnai Naiwieng jong u snem ba la dep, ha kaba ka la ïoh ïa ka jingjop don burom da kaba ïoh 12,678 ‘vote’ bad ka la pynliem noh ïa ka nongïakhun pyrshah ba ïajan eh jong ka, ka Sadhiarani Sangma jong ka Trinamool Congress, da 4,594 ‘vote’.
Ka Gambegre kostitwensi ka la sah thylli hadien ka jingiehnoh kam jong u Saleng A. Sangma, uba dei u nongthaw aiñ la lai sien, uba la shah jied noh kum u Member of Parliament na Tura Parliamentary konstitwensi.
Ka jingjop jong ka Dr. Mehtab ka dei ka jingjop kaba khraw ïa ka National People’s Party (NPP), kaba la pynkiew ïa ka jingkhlaiñ jong ka seng sha ka 32 ngut ki dkhot hapoh Ïingdorbar Thawaiñ.
Ka jingdon jong ki nongmihkhmat kynthei hapoh ka Ïingdorbar Thawaiñ kaba 60 ngut ki dkhot ka la kiew sha ka saw ngut ha kane ka kynti.
