Shillong, Nailur 08
Da kaba shim ïa ka kaiphod ‘The Future of Jobs Report 2025’ jong ka World Economic Forum (WEF), u Myntri Sorkar Pdeng ba dei peit ïa ka tnat Labour & Employment bad Kam Ïalehkai, u Dr. Mansukh Mandaviya u la ong ba ka jingbym don kam don jam ha India ka long 2%, kaba long kaba duna tam napdeng ki ri G20. U la pynpaw kumno ka jingpynmih kam ka la jia ha kylleng ki bynta ryngkat bad ka jingkiew stet ka ïoh ka kot jong ka India, bad u la ban jur ïa ki skhim Sorkar kiba la noh synñiang sha kane ka kam.
U Myntri Sorkar Pdeng u la ai jingkren ha ka jingïalang ha New Delhi ha ka sngi Nyngkong ha ka jingïasoi ïa ka Memorandums of Understanding (MoU) hapdeng ka tnat Labour & Employment bad ka ‘Mentor Together’ bad ka ‘Quikr’ na ka bynta ban kyntiew ïa ki lad ïoh kam ïoh jam bad kumjuh ruh ïa ka jingïoh kam jong ki samla ha ka rynsan National Career Service (NCS). Ïa kane ka MoU la ïasoi ha ka jingïadonlang u Myntri Sorkar Pdeng u Dr. Mansukh Mandaviya bad ka Myntri Khynnah ka Sorkar Pdeng ka Sushri Shobha Karandlaje.
Ha ka jingai jingkren jong u, u Dr. Mandaviya u la ong, “Ka rynsan National Career Service (NCS), kaba don haduh 52 lak ngut ki nongpyntreikam kiba la pynrung kyrteng, 5.79 klur ngut ki nongwad kam bad palat 7.22 klur tylli ki kam ba lait, mynta ka nang kiew ban ai ym tang ïa ki jingpynbna kam, hynrei kum kawei ka jaka pdeng na ka bynta baroh ki kam kiba ïadei bad ka jingïoh kam. Mynta, ki don palat 44 lak tylli ki kam ba lait ha ka rynsan. Ha kine ki snem ba la dep, ka tnat ka la ïasoi ïa ki MoU bad ki shiphew tylli ki seng ba kongsan, kynthup ïa ka Amazon bad ka Swiggy. Kine ki jingïatreilang ki la plie lad na ka bynta san lak tylli ki kam.”
Haba kren shaphang ka jingpyrkhat thymmai jong ka Sorkar halor ki samla, u Dr. Mandaviya u la pynkynmaw, ha kaba sdang jong ka samoi treikam kaba lai, u Myntri Rangbahduh u Narendra Modi u la pynbna ïa ka package jong ki san tylli ki skhim ba kongsan ryngkat bad ka mang tyngka baroh kaba T.2 lak klur ban kyrshan ïa ka kam, ka jingtbit, bad ki lad ki lynti na ka bynta 4.1 klur ngut ki samla. Kawei ka bynta ba kongsan jong kane ka package ka dei ka Pradhan Mantri Viksit Bharat Rozgar Yojana (PM-VBRY), kaba la mang pisa haduh T.99,446 klur, kaba thmu ban ai jingmyntoi ban thaw ïa palat 3.5 klur ki kam ha ki ar snem, ha kaba 1.92 klur kin ai jingmyntoi ïa kiba wan trei nyngkong.
U Myntri u la ban shuh shuh ïa ka jingdonkam ban thaw ki lad ïoh kam lyngba ka jingkiew jong ki kam ai jingshakri, ki kam shna tiar, bad ka rep ka riang, da kaba kdew ba ka Sorkar ka la sdang ïa ki skhim wanrah jingkylla kum ka MUDRA bad ka PM SVANidhi ban kyntiew ïa ka jingseng kam lajong.
Haba pdiang sngewbha ïa ka jingïatreilang hapdeng ka tnat bad ki ar tylli ki seng, u Dr. Mandaviya u la ong ba kine ki jingïatreilang kin plie ïa ki lad ïoh kam kiba biang bad kumjuh ruh ïa ka jinghikai ba la buh ryntih ïa ki nongwad kam, khamtam ha kaba ïadei bad ka Pradhan Mantri Viksit Bharat Rozgar Yojana ka ban sdang treikam ha u Nailar mynta u snem. Kine ki jingïatreilang, ha kajuh ka por, kin ai jingmyntoi ym tang ïa ki samla, hynrei ïa ka ri hi baroh kawei, u la bynrap. “Kan pynthikna ba ka lawei jong kane ka ri, bad jong ki samla jong ka, kan long kaba phyrnai,” u la ong.
Ka Myntri Khynnah jong ka Sorkar Pdeng ba dei peit ïa ka tnat Labour and Employment, ka Sushri Shobha Karandlaje ka la ong ba ka NCS ka la long kum ka rynsan ba bha tam jong ka India na ka bynta ka jingplie lad digital ban ïoh kam, kaba plie ïa ki lad ban ïoh kam, ka jingai jingmut, bad ka jingtbit ha kawei ka jaka. “Kane ka jingïatreilang ym tangba kan ïarap ïa ki samla jong ngi ha kaba ïoh kam ïoh jam, hynrei kan long ruh ka jingïalam lynti kaba biang na ka bynta jong ki”, ka la ong.
La khmih lynti ba ka jingïatreilang bad ka Mentor Together kan poi sha ar lak ngut ki samla ha ka snem ba nyngkong jong ka, kynthup shi lak ngut ki samla na ka NCS bad shi lak ngut ki nongwan rung hapoh ka Pradhan Mantri Viksit Bharat Rozgar Yojana, kaba pynbiang ïa ki jingai jingtip ba kyrpang sha kito kiba wad kam, khnang ba kin ym don ki nongwad kam kiba sahdien. Kan ïarap ruh ïa ki nongwad kam ba nyngkong, khamtam kito kiba na ki longïing kiba duna ka jingïoh jingshakri, ban ïoh ïa ka jingïalam lynti ba kyrpang na palat 24,000 ngut ki riew shemphang kiba la shah hikai pyntbit.
Ka jingpynthymmai ïa ka MoU bad ka Quikr ka thmu ban pynkhlain shuh shuh ïa ka jinglong jingman ba ïadei bad ka jingïoh kam da kaba pynïasoh ïa palat 1,200 tylli ki jingpynbna kam man ka sngi ha kylleng ki 1200 tam ki nongbah naduh ka Quikr Jobs haduh ka rynsan NCS. Kane ka jingïatreilang kan pynïar ïa ka jinglah ban ïoh kam ha ka por na ka bynta ki million ngut ki nongwad kam, khamtam na ki jaka nongkyndong bad ki jaka ba duna ka jingïoh jingshakri.
Ka MoU bad ka Mentor Together bad ka Quikr ka thmu ban pynbiang sa kawei ka bynta, bad pynkhlaiñ ïa ka jingthmu jong ka tnat ban pyndap ïa ka jingduna hapdeng ki nongwad kam bad ki kam jong ki riew shimet. Ha kajuh ka por, kine ki jingïatreilang ki pyni ïa ka rukom treikam kaba la pynkhreh na ka bynta ka lawei-kaba long digital, kaba kynthup lang ïa baroh, bad kaba don burom.
