Shillong, Nailur 08
U Chief Executive Member ka Khasi Hills Autonomous District Council u Bah Shembor-lang Rynjah ha ryngkat ki Executive Member (EM) ha ka 8 tarik u Nailur ki la lum la lang ïa ki ophisar jong ka Hima Mylliem,u païem bad ki Myntri, ki ophisar na ka tnat pulit bad ki ophisar ka tnat enforcement jong ka KHADC ban ïa pyrkhat halor ka jingïoh jingujor na ki paitbah halor ka jingshong shngaiñ ha ïewduh.
U Bah Powell Sohkhlet u la ong, ka sorkar ha kine ki sngi ba la dep, ka la paw ba ka thmu ban pynitynnad bad pynbha ia ka ïewduh. hynrei lada kam don ka jingshngaiñ kam myntoi, namar ki nongtuh, nongleh kam sniew khamtam kiba dih drok kin mih kin leit katba mon, kumta na ka liang ka District Council ka don ka jingsngewkhia ïa ka jingbym sngaiñ ka ïewduh.
U la ong, kawei na ki daw ba kam shongshngaiñ ka ïewduh ka dei ka jingjyllei ki briew ba dih drok, kiba shong ha ki lynti ki syngkien ha ka por ba ki longkmie bad ki nongleit nongwan ki leit ha ïewduh.
Ha kaba ïadei ba don ki briew ki ba sah miet hapoh ïewduh,ka KHADC ka la pan jingpynshai na ka Hima Mylliem bad ka la pyntip ba ki don katto katne ki dukan ki ba la pan jingbit na ka Hima ban sah miet ha ïewduh, u Bah Powel u la ong haba ïadei bad kine ki briew ba sah ha ïew ka KHADC ka la bthah ïa ka Hima ba ki dei ban ai noh da ka ‘identity card’.
Nalor kata ha kane ka jingialang ka KHADC ka la pan jingshai ruh na ka Hima, la ka shah ne em ban die kyiad ha iewduh, ha kaba ka Hima ka la pynpaw ba kam shym la don ka jingai jingbit kaba kum kata. Hynrei ki don pat ki briew ki ba die kyiad be-aiñ hapoh ïewduh.
Halor kine ki jingsniew ki ba don ha ïewduh lyngba kane ka jingialang la thaw ïa ka kynhun treikam ba kyrpang (Operation Team) kaba la khlieh da u bah Lanong bad la aibor ïa kane ka kynhun ba kin shong jingialang noh ha kine ki sngi ba kin pyntyllun ïa ka kam. La buh por ruh ïa ki ba naduh ka 15 tarik kin sdang noh ban pynlong ka jingpahara hapoh ïew.
“Kumba long mynta don haduh 89 ngut ki pulit kiba ju don duty ban pahara ïa ka ïew, kata na ka Cantonment PS 23 ngut, ki pulit syiem 35 ngut, na ka tnad Enforcement jong ka Council 25 ngut bad ki don ki CRP 6 ngut” la ïathuh u Bah Winston Tony Lyngdoh, EM.
U Bah Winston Tony Lyngdoh u la pynshai shuh shuh ba kane ka ‘operation team’ ka dei ban phah ïa kine ki pulit ban pahara, mynsngi la ka jong bad mynmiet la ka jong, hynrei ki bor pahara ki dei ban don bad miet bad sngi ha ïewduh na ka bynta ban pynlong ïa ka ïew ka ba shong shngaiñ.
