Jaipur:
U Farhan Akhtar ula ai jingiaroh ia ka sorkar Rajasthan ha kaba iadei bad ka Film Tourism Promotion Policy ha kaba une u tyngshop uba long ha kajuh ka por u direktor u sngew ba ka Rajasthan ka don ia kiei kiei kiba khring ia ki briew na kiwei pat ki bynta jong ka ri bad kumjuh ruh ia kiba shabar ri.
U Farhan ha ka jing leit jong u sha Rajasthan na ka bynta ban wad ia ka jaka kaba biang ha kaba iadei bad ka phlim thymmai ba un direk ula shem ba ki don ki jaka kiba lehse bun kim pat shim la tip ba ki dei kiba don ha Rajastan bad sngew ba lyngba ka jingwan ak phlim ha kane ka jylla ka kam jngoh kai pyrthei ha Rajasthan kan sa nang kham jur bha ha kine ki snem ban wan.
U Farhan ha ka jing leit jong u sha Rajasthan u la iohlad ban iakynduh ia ka Gayatri Rathore, Principal Secretary (Tourism) bad ha ka jingiakren bad ka Gayatri ula iohsngew ba ka sorkar Rajathan ka la shim ia ka lad pyntreikam ia ka Film Tourism Promotion Policy ha kaba ka jingthmu jong kane ka dei ban khring ia ki briew na kiwei kiwei ki bynta jong ki ri ka pyrthei ban wan jngoh ia kiei kiei kiba don ha Rajasthan.
Lyngba ka Film Tourism Promotion Policy ka sorkar Rajasthan ka kyrmen skhem ba kan dang lah shuh shuh ban khring ia ki briew sha ki jaka kiba itynnad bad kiba ym pat ju kham iohi ha kane ka jylla.
Kawei ba ka tnat Tourism jong ka Rajasthan ka angnud eh ka dei ruh ban pyni sha kiwei ia ka jingriewspah ka kolshor jong kane ka jylla, ka jingdon jong ki jingrwai tynrai bad ka suh ka thaiñ jong kane ka jylla.
Katba dang iaid ki sn em ka jylla Rajasthan ka la khring ruh ia ki nongshna phlim ka Bollywood ban wan ring ia ki phlim thymmai jong ki sha ki shnong ki thaw ba don ha kane ka jylla bad nalor kane la sakhi ba bun ki khlur ak phlim ka Bollywood ki la phaikhmat ruh sha ka Rajasthan kum ka jaka kaba biang na ka bynta ki jingkyntiew kurim.
