Shillong, Lber 26:
U MLA ka Mawkyrwat, u Bah Renikton Lyngdoh Tongkhar, u la ai jingmut ba dei ban leh ïa ka Roster System ha ki distrik kumba leh ïa ka ‘reservation policy’ haba ïadei bad ka rukom thungkam.
U Bah Renikton u la ïathuh ba u ïakynduh ïa u Myntri Rangbah u Conrad K Sangma bad nga pynsngew ha u ïa ka jingkhmih lynti ban ïatai ha ka dorbar, hynrei wat la katta u la ai jingmut ban pynbha ïa kane ban pyntreikam bad khamtam eh hapoh ki distrik namar ba ki dang don ki jingeh bakhraw.
“Kumba ka long, ka Sorkar ka la ïaleh ban pynjem ha ka rukom pyntreikam ïa kane ka ‘roster’ ba kan ym da ktah hapoh ki distrik. Ngin pyrshang ban peit ban pyntreikam kumba ngi leh hapoh ki distrik, kumba long mynshwa ïa ka ‘reservation’ hapoh ki distrik bad ngi khmih lynti ruh mynta ba kan long kumta,” u la ong.
U Bah Renikton u la ong ba ka mat ban ïatai ka dei kaba ki khun samla jong ka jaitbynriew ki la kmen palat ban ïatai ha ka dorbar halor ka bhah thungkam khamtam ïa ka jingpyntreikam ïa ka ‘roster system’ hapoh ka jylla bad ki distrik bapher bapher.
U la ong ba ka por shong dorbar ka kut noh namar ha ka sngi Thohdieng ka kut noh ha ka por 12 baje shiteng sngi, hynrei ka shong ha u Lamphang la un pynjlan ïa ka por namar khlem ïoh shuh ïa ka por ban ïatai ha kaba bun ki dkhot ruh ki la pynkhreh ban ïashimbynta.
U Bah Renikton u don ka jingkyrmen ba ha ka dorbar ka ban wan, yn ïoh ban ïatai ïa kane ka mat kaba ki khun samla ki ap, bad lada long kaba lah, ka sorkar kan pynbeit ïa kane kaba don jingeh ha kiba bun ki liang haba pyntreikam ïa ka reservation policy bad ka roaster system.
Kumta u Bah Renikton u la ong ba u sngewthuh ïa ka jingud jong ki samla bad kiba bun ha ka bri Hynñiewtrep bad u kyrpad ïa ki samla ba kin long kiba ïai shah namar yn rah biang ha ka dorbar ban wan. Namarkata, u ngeit skhem ba ka motion kaba ma u ruh u rah kan ym ïap, hynrei kan ïoh ban bteng biang ban ïatai ha ka dorbar ban sa wan.
U la ong ruh ba kum uwei na kiba wanrah ïa ka mat ïatai, un sa ai da ka jingthoh sha u Commissioner Secretary ban pynsah ïa ka motion khnang ban ïoh ïatai noh ha ka dorbar ka ban wan.
