Shillong, Lber 26:
Ka Sorkar Jylla ka la ïakynduh jingeh haba ïadei bad ka jingtei ïa ka kad liengsuiñ kaba thymmai namar ym pat tikna haduh mynta, wat la ka Kad Liengsuiñ ha Umroi kam pat lah ban treikam bha khamtam ban don ki liengsuiñ kiba kham heh.
Na ka liang u Myntri Rangbah u Conrad K Sangma u la ong ba ki dang don shibun ki jingartatien haba ïadei bad ka kad liengsuiñ thymmai.
U Conrad u la jubab ïa ka kane haba kylli halor ka jingbym pat treikam bha ki kad liengsuiñ kynthup ka Umroi Airport bad kumno ban pynbit pynbiang bha noh.
Nangta, u la pynkynmaw ïa ka mukotduma ha Ïingbishar bad ka hukum jong ka, ha kaba la bud ban peitbniah ïa ki katto katne ki kam bad la leh ruh ïa kita ki kam.
U la ong ba donkam ban sngewthuh ba haba tei thymmai kat ïa ka kad liengsuiñ, ka donkam ka jaka kaba heh bha, kaba lah ban kot da ki spah klur ban thied, bad ka don ruh ka jingbym tikna la ka Sorkar India kan bei pisa ne em bad katno kan mang pisa.
Kumta u Myntri Rangbah u la ong ba kaba kham suk tam ka long ban peit ba la kumno-kumno ka kad liengsuiñ kaba la don kan long kaba kham biang da kaba pynurlong ruh ban pynjrong ïa ka jaka hiar bad jaka kiew liengsuiñ (runway) bad pynbit pynbiang ïa ki tiar ki tar kiba lah ban ïarap ban hiar ki liengsuiñ kiba kham heh.
U la ong ba ka Sorkar kan peit thuh baroh ar tylli kata ban pynheh ïa kaba la don ne wad jaka thymmai namar hangne kan don ruh ka jingktah ïa ka pisa bad hap ban peit lang kaei kaba lah ban kham pyllang pisa bad kumno ban pyndonkam ïa kaba la don lypa.
