Shillong, Lber 27:
U Myntri Rangbah, u Conrad K Sangma u la ai ka jubab haduh 3 kynta tam ha Ïingdorbar Thawaiñ ka Jylla halor ki jingïatai kiba la wanrah da ki MLA ka Liang Pyrshah bad ka Liang Synshar halor ka mang tyngka ha kaba bun ngut ki MLA ka Liang Pyrshah ki khlem shong ha Ïingdorbar, lait noh tang 5 ngut ki shong beit haduh ban da wai syndon ka dorbar haduh jan dap 8.30 baje da miet.
Kane lehse ka dei ka jubab kaba jrong tam ba u Myntri Rangbah un ai ha Ïingdorbar Thawaiñ haduh palat 3 kynta halor ka jingïatai kaba ïadei bad ka mang tyngka, ha kaba u la pyrshang ban jubab lut ïa ki mat kiba la wanrah da ki MLA.
U Conrad u la ïeng ban jubab ha ka por 5.05 baje janmiet bad u la pynkut ha ka por 8:17 baje da miet, kaba la neh 3 kynta tam.
U Conrad u la pan map ruh na ki MlA baroh ba un nym lah ban jubab lut ïa ki mat ïatai, hynrei un pyrshang katba lah ban jubab namar u la dep ban thoh ïa ki mat kiba la pynsngew bad ai jingmut da ki MLA na ka Liang Pyrshah bad Liang Synshar ruh kumjuh.
U la ong ba ka long kaba sngewsih pat ban ïohi ba ki don ki MLA kiba khlem shong syndon ha Ïingdorbar ban sngap haba ai jubab namar ki don tang 5 ngut ki MLA ka Liang Pyrshah kiba shong ban sngap haduh ban kut ka dorbar, katba ki MLA ka Liang Synshar ki don lut baroh.
U Conrad u la ong ba watla ki don ki MLA kiba kynthoh ba kim don jingshaniah, hynrei ka jingshaniah kaba ki paidbah ki ai ka dei da ki MLA ka MDA bad ma u kum u Myntri Rangbah bad ka Sorkar u don ka mon ban trei na ka bynta ki paidbah ka Jylla kiba don kumba 38 lak ngut.
U la ong ba u la pyrshang ban shim ïa ki mat kiba pynsngew da ki MLA tangba ma ki pat kim don wat ha ïingdorbar.
Ki MLA ka Liang Pyrshah kiba don haduh ban wai ka dorbar ki kynthup ïa u Bah Charles Pyngrope (TMC), Dr Celestine Lyngdoh, Gabriel Wahlang, bad Charles Marngar kiba dei jong ka Congress, lait noh u Bah Ronnie Lyngdoh uba la mih noh kloi ban leit sha Guwahati ba don ba shitom bahaïing.
Na ka VPP, dei tang u MLA na North Shillong u Bah Adelbert Nongrum uba shong haduh ban da kut.
U Dr Mukul Sangma (TMC), bad u Saleng Sangma (Congress) ki don kham hashwa, tangba ki khlem shong haduh ban da kut.
Ki MLA ka VPP kiba khlem shong ha ïingdorbar ki long u Bah Ardent Basaïawmoit, Brightstarwell Marbaniang, bad Heavingstone Kharpran.
