Shillong, Lber 27:
U MLA ka Congress na Umsning, Dr. Celestine Lyngdoh u la ong ba nalor ki Khasi, Jaiñtia bad Garo kiba long ki jaitbynriew heh paid ka Jylla, mynta la mih sa kawei pat ka jaitbynriew ïa kaba la tip kum ka jaitbynriew ‘High Level’.
“Nga ai khublei ïa u Myntri Rangbah ka Jylla uba la wanrah ïa kawei ka jingthew bathymmai halor ka jingkmen. Hynrei haba kren shaphang ka jingkmen, nga sheptieng ba lada ki briew ki ong ba ngi dei na ka Jylla kaba wan banyngkong hapoh ka ri ha ka liang ka bamsap, nga artatien la ka jingkmen jong ngi kan kiew ne hiar,” la ong u Dr. Lyngdoh haba ïashim bynta ha ka jingïatai halor ka Mang Tyngka hapoh ïingdorbar thawaiñ ha ka Lah Sngi U Blei.
Halor ki jingkynnoh bamsap, u la ong ba yn ym lah ban kiar da lei-lei ruh ïa ki namar kitei ki jingkynnoh kim shym la wan nangne-nangtai, hynrei ki jingkynnoh ba dang shen ki la wan na u briew uba bat ïa ka kyrdan kaba kongsan bha hapoh ka ri.
“Ngim lah ban shu ieh noh kumto, ïa katei ka jingkynnoh ym shym la pynsngew ha dukan sha ne kyndong-kynshrot, hynrei la kren ha ka jingïalap ilekshon kaba heh ha ka jingïadonlang jong ki hajar ngut ki paidbah ha kaba la ong ba ka Meghalaya ka dei ka Jylla kaba bamsap tam hapoh ka ri,” la ong utei u nongmihkhmat.
Haba kdew ba katei ka jingkynnoh ka la ktah matïong shi kat dei ïa ka Jylla, u Dr. Lyngdoh u la pynpaw ka jingsngewkhia ïa la ki khun samla (kiba pule) bad kito kiba trei shabar ka Jylla.
“Ynda ki ïakynduh ïa ki paralok jong ki, kin sa ong ba ka Jylla jong phi ka dei ka nonglute kaba nyngkong eh ha ka ri. Kumno kin sngew. Kane ka ktah shi kat dei ïa ka Jylla bad ka jaitbynriew,” u la ong.
Haba buh jingkylli ïa ka kaiphod ka skhim Saubhagya halor ka jingkynnoh pyndonkam bakla ïa kumba T.149 klur, ka jingkynnoh bamsap halor ka ‘Smart Meter’, jingkynnoh bamsap halor 1 lak byrni u khaw (PDS) ba la ïoh bat ha Boko, Assam, u MLA u la ong ba kitei baroh ki long ki jinglong-jingman ha kaba ki VIP ne ki kynrem ki lyndan ki mih shakhmat ryngkat kitei ki jingkynnoh ba ka Meghalaya ka wan banyngkong hapoh ka ri ha ka liang ka bamsap.
“Ha Meghalaya, la shong shnong da 3 tylli ki jaitbynriew heh paid – Khasi, Garo bad Jaiñtia, hynrei mynta la mih sa kawei pat ka jaitbynriew bad namar kane ka jaitbynriew bathymmai, ka tnat pulit ka la duh jingshaniah hakhmat ka ïingbishar ka Jylla bad ka ïingbishar ka la dawa ban wanrah noh da ki pulit CISF ban khmih ïa ki kam ki jam jong kane ka jaitbynriew bathymmai. Kaei ka kyrteng jong kane ka jaitbynriew bathymmai ka Meghalaya…ka dei ka jaitbynriew ‘High Level’,” la ong u Dr. Lyngdoh.
Haba pynsngew ba baroh kitei ki kam kiba la wan jia bad kiba la pynlong ïa ka Jylla ban shah ñiew kum kaba bamsap tam hapoh ka Ri, utei u nongmihkhmat u la ong ba don mano-mano ba pynïaid na sha lyndet.
Shuh shuh u la bynrap, “Nga kyrmen ba kane ka Sorkar ba mynta kan lah ban tehlakam ïa kane ka jaitbynriew bathymmai, ka jaitbynriew ‘High Level’. Kane ka jaitbynriew bathymmai la ai lad ba kan ïeng rasong bad riewspah hapoh ka jingkhmih jong ka MDA-I.”
Nalor kane, u la kyrpad ïa ka Sorkar ba mynta ban wanrah biang ïa ka nam ka burom jong ki paidbah, jong ki briew kiba phong ‘uniform’, bad jong ka Jylla hi baroh kawei.
