Shillong, Lber 27:
Ka jingjot rathai ka surok ha Langkyrding, Nongmensong kaba don hajan ka skul BDW International School ka la long kaba dang ïai sahteng haduh kine ki sngi.
Hadien ba ka la don ka jingud jingnam na ki paidbah ha kaba ïadei bad ka jingjot jong katei ka surok, ha u snem ba la dep ha u bnai Naiwieng, na ka liang U Nongsaiñ Hima u la leit ban jngoh dalade ïa katei ka surok bad la shem ba katei ka jingjot ka la long kaba shisha.
Katei ka jingjot katei ka surok ka la wanrah ka jingsyrtok kaba jur bha ïa ki nongleit nongwan kiba ïaid kiba ïeng na katei ka surok bad la ïohi ba katei ka surok ka la dap da ki jingpei suda bad da ka um.
Shuh shuh na ka liang U Nongsaiñ Hima ha ka lah sngi U Blei ka 27 tarik u bnai Lber, 2023 u la leit ban jngoh biang ïa ka jinglong jingman jong katei ka surok bad la shem ba katei ka surok ka la neh beit kumba ju long khlem don satia kano kano ka jingpynbha pynmiat hynrei ka la sahteng kumtei kumba ka long la katto katne por eiei naduh ha ka por ka sorkar kaba rim ka Meghalaya Democratic Alliance (MDA) bad kumjuh ha kane kajuh hi ka sorkar kaba mynta.
