Venice:
Ki bor ba dei peit jong ka Venice Film Festival ki la pynbna ia ka kyrteng jong ka Liliana Cavani bad Tony Leung kum ki ban sa iohpdiang ia ka Golden Lion awards ha ka 2023 Venice International Film Festival ha kaba kane ka tamasa kan sdang naduh ka 30 tarik u Nailar bad kan kut pat haduh ka 9 u Nailur.
Kum ban shu pynkynmaw ka Liliana Cavani ka long kawei na ki direktor jong ka Italy bad u Tony Leung pat u dei u tyngshop jong ka Hong Kong bad kine arngut kin sa ioh ban pdiang ia ka khusnam ba khraw bha jong kane ka tamasa kaba long ruh ka Golden Lions For Lifetime Achievement.
Kum ka direktor ka Cavani ka la paw na ka bynta ki katto katne ki phlim ba ka direk kiba kynthup ruh ka The Night Porter (1974) kaba la ak da u Dirk Bogarde bad Charlotte Rampling bad kumjuh ruh ka The Berlin Affair (1985). Ha kajuh ka por kane ka direktor ka la pyllait paidbah ruh ia kawei ka phlim lyngkot ha ka Venice Film Festival ha u 1965 kaba la ai kyrteng Philippe Pétain: Processo a Vichy.
Ha ka jingiakren ka Cavani bad ki lad pathai khubor halor ka jingshah jied ban iohpdiang ia ka Golden Lion awards ka la ong ba ka la dap da ka jingkmen kaba ym don mano mano ba lah ban batai ha kaba iadei bad kane.
U Leung pat ula ak ha ki phlim kiba kynthup ruh ka Mood for Love (2000) bad 2046 (2004). Ha kajuh ka por haduh 3 tylli ki phlim ba u ak ki la ioh ban pdiang ia ka Golden Lion Awards ha ka Venice Film Festival kiba kynthup ruh ka A City of Sadness (1989), Cyclo (1995) and Lust bad Caution (2007).
U Leung ruh u la pynpaw ka jingsngewnguh sha kito kiba la ibit ia u ban iohpdiang ia ka Golden Lions For Lifetime Achievement bad sngew ba kane ka jingshah pynkup burom jong u kan leit ruh sha kito ki direktor kiba ula iatreilang ha ki snem bad por kiba la leit bad kiba la pynlong ia u kumne kumba u long mynta.
U Festival Director Alberto Barbera haba iakren halor ka jingjied ia ka Cavani kum kawei na ki ban iohpdiang ia ka Golden Lion For Lifetime Achievement ula ai jingiaroh bha ia katei ka direktor halor ki kam ba ka trei ha kine ki snem ba la leit bad ka jingnoh synniang jong u lyngba ki phlim ba ka direk sha ka Italian Cinema.
Nalor kane ula iaroh ruh ia u Leung uba long uwei na ki tyngshop ba kynsai bha bad uba la kyntiew ia ka kam ak phlim jong u lyngba ki kam ba u trei.
