Los Angeles:
U Liam Neeson uba dei uwei na ki tyngshop ba kynsai ka Hollywood ula kren halor ka jingbym lah jong u ban mutdur ba un kiew ha ka kam ak phlim ha Hollywood bad ban long ruh uwei na ki khlur ak phlim uba la khring ia kiba bun ki nongpeitkai lyngba ki phlim ba u ak ha kaba u Liam wat haduh mynta u ju pyrkhat bha halor halor.
Une u tyngshop uba la don 70 snem uba la rung ak phlim naduh u 1976 bad uba la ak haduh 100 tylli ki phlim ha ka jingim jong u ha shwa ba un bsuh kjat ha Hollywood ula long shwa u nongak ha ki rynsan bad dei suki pa suki ba ka jingdon sap jong u ka la pynlong ia ki katto katne ki direktor ban tyrwa ia u ban ak ha ki phlim jong ki.
U Liam wat lada ula long mynta uwei na ki tyngshop ba pawnam bad paw pyrthei bha pynban um shim la klet ia ki rynsan kiba u ju don bynta ha shwa ba un ioh bsuh kjat ha Hollywood.
Ka jingsdang kiew u Liam ha ka kam ak phlim ha Hollywood ka la long naduh ba ula ak ha ka phlim jong u Sir John Boorman ka ‘Excalibur’ kaba la mih ha u 1981 bad hadien kane ula ioh ban ak sa ha ki katto katne ruh ki phlim kiba don ka khana kaba biang bha bad u.
Une u tyngshop wat lada ula jam sha ka rta kaba 70 snem pynban um pat shim la kwah ban sangeh ban ak phlim bad rai ba katba ka met ka phad ka dang ailad ia u un bteng beit ia kane ka kam.
