Mumbai:
Ka Bhumi Pednekar ka la shim khia ban wad ki lad ki lynti ban ialap halor ka jinglong donkam ban iada ia ka mariang ha kaba kane ka puron ka sngew ba ka dei ka kamram jong ka ban ai jingmut lem sha ki nongshong shnong ka India kumno ban sumar ia ka mariang na ka bynta ki pateng ban dang wan.
Ha kawei na ki jingai jingkren ka Bhumi ka la pynpaw ka jingsngewkhia mynsiem ban iohi ba bun ki briew kim pat shim la sngewthuh halor ka jinglong kordor ka mariang bad ong ba ka por kan sa poi hi ha kaba kin sa babe halor ka jingleh bym suidniew jong ki.
Ka Bhumi kaba la ak ha ka Dum Laga Ke Haisha ka kwah ruh ban pynsngewthuh sha kiba bun ba ka long donkam haduh katta katta ban thung ia ki dieng namar ba ki dieng ki long kiba donkam bha ban wanrah ia ka lyer khuid ban ring mynsiem bad kumjuh ruh iarap ban pynbha ia ka mariang.
Ha ka jingiohi ka Bhumi, katba dang iaid ki snem ki jingkylla ha ka mariang ki la wan jia ha ka pyrthei hynrei wat la katta bun kim pat shim la sngewthuh halor kane. Mynta ka kynti ka Bhumi ka sngew ba ka dei ban ieng ban kren halor kumno ban iada ia ka mariang bad kumjuh ruh ban pyni nuksa lem sha kiwei pat da kaba thung dieng.
Kane ka puron kaba la shah thung kum ka nongrah ktien ka Climate Warrior ka da kwah shisha ban shim khia halor kaei kaba la pynkhamti ia ka bad kwah ruh ba nangne sha khmat kan lah ruh ban pynkylla ia ka rukom pyrkhat jong ki nongshong shnong kane ka ri.
Haba iakren pat shaphang ki phlim ka Bhumi ka dang shu dep ak ha ka Bheed kaba direk da u Anubhav Sinha bad ngin sa iohi ruh ia ka ha ka The Ladykiller bad u Arjun Kapoor bad kumjuh ruh ha ka Afwah bad u Nawazuddin Siddiqui.
