Los Angeles:
U Denzel Washington un sa shim bynta lang ha ka phlim thymmai jong u Ridley Scott ka Gladiator 2 ha kaba la pynbna ia ka jingdon bynta jong u da u Ridley ha kawei na ki jingleit shim bynta.
U Denzel uba dei u tyngshop ba la slem ka Hollywood ula shah tyrwa ban ak ha ka Gladiator 2 ha kaba kane kan dei ka sien ba-ar ia u ban ioh ak ha ka phlim ban direk da u Ridley hadien jong ka Amer ican Gangster kaba la mih ha u 2007.
Ka Glad iator ka long kawei na ki phlim ba itynnad bha jong ka Hollywood bad kaba la ioh ruh ban rah bun tylli ki khusnam ha ka Oscar jong ki snem ba la leit bad ia kane ka phlim la pynmih ha u 2000.
Wat lada ia ka bynta jong kiwei kiwei ki dkhot kane ka phlim la dep ban pynbna pynban ia ka bynta u Denzel ym pat shim la kren eiei bad lehse ha kine ki bnai ban wan u Ridley un sa iathuh hi halor kane.
Ha ka Gladiator 2 u Paul Mescal un ak kum u Lucius bad kane ka bynta kan iaid halor kumno ba u Lucius ula shimti ia ka khet syiem.
Ha ka bynta banyngkong jong ka Gladiator la lam khmat da u Russell Crowe uba la ak kum u Maximus Decimus Meridius hynrei mynta ha ka Gladiator 2 un nym ioh shuh ban don bynta naba ka bynta jong u ka la kut noh.
Ia ka Gladiator la shna ha ka dor kaba long kumba $100 million bad ka jingiohnong pat ka long haduh $460 million bad ia ka khana la thoh da u David Franzoni, John Logan, bad William Nicholson.
Ha ka bynta ba-ar jong ka Gladiator ki ban shim bynta kin long ruh u Joaquin Phoenix, Connie Nielsen, Ralf Möller, Oliver Reed, Djimon Hounsou, Derek Jacobi, John Shrapnel, Richard Harris bad Tommy Flanagan.
Ha ka 73rd Academy Awards kaba la long ha ka 25 u Lber 2001 kane ka phlim ka la ioh ban rah haduh 12 tylli ki khusnam kaba kynthup ruh ka Best Picture, Best Director bad Best Actor. Kane ka phlim wat haduh mynta ka dang khring ia kiba bun ki nongpeitkai naba ka long ka phlim kaba pher ka khana bad ha kajuh ka por ka rukom ak.
