Shillong, Ïaïong 26:
Ka Myntri ka tnat ka Koit ka Khiah, ka Kong Ampareen Lyngdoh, ka la ong ba ka jingtei ïa ka Tura Medical College ka la ïaid shaphrang bad ka jingtei ka la dep kumba 45% na ka 100%.
Haba kren sha ki lad pathai khubor ha ka Sngi Balang hadien ba la wai ka jingïalang jong ki Human Resource (HR), ka Kong Ampareen ka la ong ba ka sorkar kan pyntikna ba ki jingdonkam na ka bynta ki khynnah pule hapoh ka Tura Medical College kin long kiba bit ba biang khamtam ka jaka sah na ka bynta ki khynnah pule bad ki nongtrei yn lah ban pyndep ha ka por kaba biang.
“Ka jingtei ïa ka Tura Medical College ka dang ïaid shakhmat bad ngi la lah ban pyndep ïa ka jingtei kumba 45% bad ngi kwah ban pyntikna ba ki jaka sah jong ki khynnah pule, ki nongtrei, ka jaka hikai hapoh ka hospital ba yn lah pyndep ha ka por kaba biang,” la ong ka Kong Ampareen.
Ka Myntri ka la ïathuh ruh ba wat la ka don ka jingïakynduh jingeh hangne hangtei ha kaba ïadei bad ka jingbei pisa ban tei ïa katei ka Medical College, hynrei ïa kitei ki jingeh la lah ban weng noh.
Ka la ong ba shen kan sa leit ban jngoh hi dalade ïa ka Tura Medical College khnang ban tip kham bniah ïa ka rukom long bad ka kam kaba dang ïaid shakhmat.
“Ngan sa leit ban jngoh shen ïa katei ka jaka bad mynta nga shu ap ïa ka Model Code na ka East Khasi Hills ban pyndep kham kloi khnang ba ngan ïoh ban sdang ban leit sha katei ka jaka ban kham sngewthuh bha tangba ka jingtei ïa kaTura Medical College ka dang ïaid shakhmat,” la ong ka Myntri.
Ha kaba ïadei bad ka Shillong Medical College pat, na ka liang ka Myntri ka la ong ba ka sorkar jylla ka hap ban pynkylla noh ïa ka jingtyrwa kaba rim bad ban don noh da kawei ka jingtyrwa kaba thymmai. Ka la ong ruh ba ka sorkar ka la shim khia halor kane ka kam ban tei ïa ka Shillong Medical College bad ka sorkar kan sa leh ïa kaba donkam.
