Shillong, Ïaïong 26:
U Symbud Myntri Rangbah ka jylla bad uba dei ruh u Vice President ka National People’s Party (NPP), u la pynpaw ïa ka jingbym lah ban mutdur namar baroh san snem ki ïathiah lang ha ka sorkar MDA-I, hynrei kaba sngew lyngngoh kiwei ki seng saiñpyrthei kiba ïatreilang ki kynnoh ïa ka seng NPP ka dei kaba sniew.
Ïa kine ki kyntien u Bah Prestone u la kren haba ïalap ilekshon ha Madanbitaw, Sohïong konstitwensi ha ka 26 tarik Ïaïong, 2023 ban pan jingkyrshan ïa u kyrtong ka seng u Bah Samlin Malngiang ba ki paidbah kin jied ha ka 10 tarik Jymmang, 2023.
Ha kane ka sngi ki paidbah ki la poi palat hajar ngut ha ka jingïadonlang u Bah Samlin Malngiang uba dei u kyrtong ka NPP na Sohïong, ki nongkitkam bad ki ’riew rangbah.
Nangta, u la ong biang ha kine ki san snem ki shim lang ïa ka rai ha ka Kynhun Myntri, hynrei kaba sngewsih ka long ha ka por ilekshon kine ki juh ki seng saiñpyrthei ki kynnoh ba ka seng NPP kaba sniew bad kane kin sa wan kynnoh biang hangne ha ka ilekshon ha Sohïong konstitwensi.
Katba u kyrtong ka NPP na Sohïong, u Bah Samlin Malngiang, u la ong ba kiba pyrshah ïa u ha kane ka ilekshon kim nang ban kren ha jingïalang lada kim ïoh ban kynthoh ïa u, namar kan sa poi ka por ba lada ki mut bamja ki hap ban kynmaw ïa ka kyrteng u Bah Samlin.
U Bah Samlin u la ong biang ba lada ki dang kynthoh ïa u, ka pyni ba ki dang ieid ïa u namar ba ki kynmaw man ki jingïalang.
U la ong ba ki 11 ngut ki MLA ka UDP mar shu dep ñiew vote ki la leit sdien ha ka bos NPP, hynrei katba ïa ki paidbah ki pyrshah ban leit kyrshan ïa u kyrtong ka NPP ha Sohïong konstitwensi. Kumta u don jingkyrmen ba ki paidbah kin long kiba stad ban ïa kaba shu leit sdien, ka bha ban leit shong beit hapoh ka bos.
Na ka liang u Bah C.B Ryntathiang uba dei u nongïalam ka NPP na Sohïong konstitwensi, u la ong ba ka vote sngewlem ïa u kyrtong ka UDP kan nym treikam shuh, namar tang shi bnai ba la khlad u Bah HDR Lyngdoh ki nongkyrshan ka UDP ki la ïashad bad kynthih ha ïing jong u kyrtong ka UDP ba mynta u Bah Synshar Lyngdoh kaba don ha Sohïong.
