Los Angeles:
Ka puron ba la khlad noh ka Carrie Fisher kaba la ak ha ka ‘Star Wars’ kan sa shah pynkup burom da ka Hollywood Walk of Fame ha kaba kane kan dei ha ka jingrakhe ia ka Star Wars Day ha ka 4 tarik jong u bnai ban wan.
Ka Hollywood Chamber of Commerce hadien ka jingdap 2 snem jong ka jingkhlad noh ka Carrie ka la shim ia ka rai ban pynkup burom ia kane ka puron da ka Hollywood Walk of Fame bad ha ka jingshisha la thmu ban leh ia kane naduh u snem ba la leit hynrei na ki daw ki bym lah kiar la hap ban pynsangeh shwa.
Ka jingpynbna ia ka kyrteng ka Carrie kum kawei na ki nongshah pynkup burom da ka Hollywood Walk of Fame kan sa long kaei kaei ka ban pynheh mynsiem bad pynkmen bha ia ki nong bud bad nongkyrshan jong ka.
Ka jingshah pynkup burom ka Carrie ka dei ruh hadien jong u Mark Hamill bad Harrison Ford bad ka kmie jong ka, ka Debbie Reynolds ruh ha ki snem ba la leit ka la shah pynkup burom da kane. Ka Carrie ka la khlad noh na ka jingpang kyndit ha u 2017 ha ka por ba ka dang mih na London ban leit sha LA.
Ka Carrie ka dei ka khun jong u nongrwai Eddie Fisher bad Debbie Reynolds bad ka la rung ak phlim ha u 1975 da kaba ak ha ka Shampoo bad u Warren Beatty.Ka la pawnam bad paw pyrthei ha ka kam ak phlim da kaba ak kum ka Princess Leia ha ka ‘Star Wars’ movie.
Kum ka puron ka la shim bynta ruh ha ki phlim kum ka The Blues Brothers, When Harry Met Sally, Soapdish bad Hannah and Her Sisters.
