Los Angeles:
Ka Netflix kumba la mih khubor ka la thmu ban pynlut haduh $2.5 bn tang ban ioh pynmih ia ki OTT jong ka South Korea ha kaba kane ka kompani ka sngewthuh shai ba ki OTT kiba la pynmih na South Korea ki dei kiba itynnad bha bad kiba lah ruh ban khring ia ki nongpeitkai.
Ka South Korea kaba la paw na ka bynta ki katto katne ki drama kiba itynnad bha jong ka kiba kynthup ruh ka “The Glory”, “Crash Course in Romance” bad “Squid Game” ki dei kiba la khring shisha ia ki nongpeitkai ym tang ha katei ka ri hynrei wat sha kiwei kiwei ki bynta jong ki ri ka pyrthei bad dei ruh na kane ka daw ba ka Netflix ka la shim ruh ia ka rai ban ioh pynmih lem ia ki OTT ka South Korea ha kine ki snem ban wan.
U CEO ka Netflix ha ka jingai jingkren sha ki lad pathai khubor ula pynpaw ia ka jingdon jingkyrmen ba ki OTT jong katei ka ri ki ban pynmih lyngba ka Netflix kin long kiba iaid bha.
Ka daw ba ka Netflix ka la shim khia ban ioh pynmih sa ia ki OTT na katei ka ri ka long namar ba ki don ia ki khana kiba biang bad ha kajuh ka por ki samla ki ju shah khring bha la ka long ha ki phlim ne ki drama kiba la shna bad pynmih da ka South Korea.
U Ted Sarandos uba long u CEO ka Netflix ula dep ban iakren bad u Presi dent ka South Korea u Yoon Suk Yeol ha Wash ington ha kaba iadei bad katei ka jingthmu ka Netflix.
Ha kine ki saw snem ban wan ki paidbah kin sa iohi ia ki drama, series bad kumjuh ruh ki Films jong-ka South Korea ki ban pynmih lyngba ka Netflix bad lehse lyngba kane kan don ka jingmyntoi ia katei ka kompani bad ha kajuh ka por ia ka South Korea ruh kumjuh.
Haba nujor bad kiwei kiwei ki ri ka pyrthei ki phlim lane ki drama bad kumjuh ruh ki series kiba la pynmih na South Korea ki da khring shisha ia ki nongpeitkai bad ki don ruh ia ki khana kiba sngewtynnad kiba pynbang shisha ia kiba bun ban kwah peit ia ki.
Ha ki snem ba la leit haduh 60% ki nongshong shnong jong ki ri ka pyrthei ki ju shah khring bha ha kiei kiei kiba la pynmih da ka South Korea.
