Shillong, Ïaïong 27:
Ka United Hynñiewtrep Movement (UHM) ka la leit ban ai da ka jingthoh ha u Myntri ba dei khmih ïa ka tnat pule puthi ka jylla, u Rakkam A Sangma halor ka jingheh dor ha ka rukom siew ïa ka bai skul ki khynnah pule hapoh ka jylla.
Haba kren sha ki lad pathai khubor ha ka Sngi Palei, u Bah Stewart Malngiang uba dei u Education Secretary ka UHM, u la ong ba ka seng ka la pynpaw sha utei u Myntri ba ka jingheh dor ka jingsiew ïa ka bai skul ka la long ka bym lah ban pdiang namar ba ki khynnah skul kiba wan na ki longïing longsem kiba duna ka ïoh ka kot, hynrei kiba biang ha ka liang ka pule ka puthi kim lah ban siew ïa ka dor jong ka bai skul.
Nangta u Bah Malngiang u la ong ba ka seng ka la pynpaw ruh sha utei u Myntri ba ki skul shimet ne ki ‘Private School’ ha nongbah Shillong kim dei ban phah ïa ki khynnah skul bad ki kmie ki kpa ban phah thied ïa ki jaiñ skul lane ki ‘School Uniform’ napoh ka skul lane na ki dukan kiba la bthah, hynrei ki dei ban shah ban leit thied na kino kino ki dukan kiba ki kmie ki kpa ki sngew mon bad ba kham duna ka dor.
Shuh shuh ka seng lyngba ka shithi ka la pynpaw ruh ba lyngba ka Article 21(A) jong ka riti synshar ka Ri India kaba ong ba kino kino ki khynnah kiba don ha ka rta kaba 6 haduh 14 snem kin ïoh ïa ka jinghikai kaba ym donkam ban siew. Kumta ka seng ka la ong ba ka sorkar ruh ka dei ban peit bad ban ai ba kane ka jingshong skul kaba ym donkam ban siew ka dei ban urlong ha ki skul sorkar bad kiwei ki skul kiba ai jingïarap da ka sorkar bad kumjuh ruh na ka bynta ki skul shimet ne ki skul kiba seng da ki balang bapher bapher ki dei ban ailad ïa ki khynnah ba kin shong skul khlem da siew ïa ka dor.
Ka seng ka la kyntu ruh ïa u Myntri ba dei ban pyndait ïa ki CCTV Camera ha ki jaka pule kum ha ki kam skul bad ha ki madan ïalehkai khnang ba yn lah ban pyntikna ba ki khynnah skul bad ki nonghikai kin pyndep ïa ki kamram ba la buh.
Na ka liang utei u Myntri u la ong ba na ka liang ka tnat jong u kan sa khmih halor kine ki bynta bad un sa khot jingïalang biang sa shisien ha kaba ïadei bad kine ki mat ba la pynsngew da ka seng.
