Los Angeles:
U Nongrwai ka kynhun Poison u Bret Micheals ula kren halor kane ka kynhun da kaba ong ba da lei lei ruh kan ym pait ym pra kumba long kiwei pat ki kynhun rwai ha kaba un ialeh beit ban shim khia ban pynlong lang ka wei ia baroh ki dkhot.
U Bret ha ka jingiakren bad ka wei ka Magazine ula iathuh ba ka Poison ha ki snem ban wan kan ialeh ruh ban khring ia kiba bun da ki thup jingrwai thymmai jong ka bad angnud ruh ba kane ka kynhun kan pyndep ia ki jingthmu jong ka baroh.
Ka Poison ha ka jingshisha ka la dei ban mih pyrthei mynta u snem ban leit rwai kylleng hynrei na ka jingshitom u Bret la pynkynriah noh shwa ia kane haduh u 2025.
Ha u 2018 kane ka kynhun ka la pyndep ia ka “Nothin’ But A Good Time” tour bad ka thup jingrwai ba khatduh eh ba ka la pynmih dei ha u 2002 kaba la ai kyrteng “Holly weird”.
Ha ki snem ba la leit kane ka kynhun rwai ka la paw na ka bynta ki katto katne ki thup jingrwai ba sngewtynnad jong ka kaba la khring ruh ia kiba bun ki riewieit jingrwai.
