Shillong, Ïaïong 27:
U Myntri ka tnat Pynroi Sor, u Bah Sniawbhalang Dhar u la ong ka Sorkar Jylla ka la phah jingtip lyngba ka kot jingpynshisha (affidavit) sha Ïingbishar haba ïadei bad ki lad kiba ka Sorkar ka shim hadien ba la ïohpdiang ïa ka jubab na ka Harijan Panchayat Committee (HPC).
“Ngi la ïohpdiang ïa ka jubab na ka HPC, bad na ka liang ka Sorkar ka la phah da ka kot jingpynshisha sha ka Ïingbishar halor ki lad kiba ngi dei ban shim,” la ong u Bah Sniawbhalang.
U la ong ba ka dei ka bynta jong ka Sorkar ban pyntip sha ka Ïingbishar haba ïadei bad kane ka kam.
Ka Ïingbishar kan sa bishar biang ïa kane ka kam ha ka 7 tarik Jylliew mynta u snem.
Dang ha kine ki khyndiat sngi, ka HPC lyngba u Secretary, u Gurjit Singh u la ong ba kiba sah ha Them Ïew Mawlong, ki dei kiba la don ka khana bad ki dei ki nongshong shnong ka Meghalaya ym kum kita kiba sah be-aiñ.
U Singh u la ong ba ka HPC ka long borabor kaba kloi ban ïakren kumba la dep batai teng ha ka jubab kaba la phah sha ka Sorkar Jylla bad ka Ïingbishar.
Ka HPC ka la ong ba ka saiñdur kaba la pyni ka dei ka bym pat biang, namar ym shym la batai shai kum ka jaka kaba dei ban ai na ka bynta ki longïing.
Nangta u Singh u la pynkynmaw ba ki la don ki khana kumno ki kpa tymmen ki la poi sha Shillong ba wanlam ha ka por ki shipai Phareng bad ki heh jong ki na Gurdaspur bad Amritsar district ha Punjab.
U la ong ruh ba naduh u snem 1863 la don ki kot ki sla kiba biang ha ka kyrteng bad muhor jong u Syiem ka Hima Mylliem. U la ong ba ha ka kot jong u snem 1954, la batai shai ba ka jaka ka dei jong kiba sah ha Them Ïew Mawlong (Harijan Colony).
U la ong ruh ba ha ka shithi habu snem 2008, u Syiem Mylliem u la ong ba ka jaka ka dei kaba la ai la slem da kiba ha shwa jong ka Hima Mylliem.
Na ka liang u Symbud Myntri Rangbah u Bah Prestone Tynsong u la ong ba ka jingpynkynriah ïa kiba sah ha Them Ïew Mawlong ka hap ban jia beit.
