Shillong, Ïaïong 27:
Wat la ki khubor kiba tikna ba u Bah Banteidor Lyngdoh, MLA ka PDF na Mawkynrew konstitwensi un sa rung noh sha ka National People’s Party (NPP) lem bad u Bah Gavin Mylliem, MLA ka PDF na Sohra konstitwensi, hynrei ki khubor kiba ïajan ki ïathuh ba u Bah Kansing Lynshiang, u kyrtong ka NPP ha kane ka ilekshon ba dang shu dep na Mawkynrew konstitwensi ryngkat bad ki nongkyrshan kin nym mih na ka seng NPP.
Kum ban shu pynkynmaw ha kine ki khyndiat sngi hadien ba la mih ki khubor, ki nongkyrshan ka NPP kiba dei ki nongbud u Bah Kansing ki la sngewrit mynsiem namar kin shah kyntait noh sharud ynda la rung u Bah Banteidor Lyngdoh lem bad ki nongkyrshan jong u.
Ki khubor ki ïathuh ba ki nongkyrshan jong u Bah Kansing kin nym mih da lei-lei na ka NPP kumba ki la dep pynkhlaiñ ïa ka seng ha kane ka ilekshon MLA ba la dep kat haduh ba ki la ïoh 7000 eiei ka ‘vote’ namar ki kwah ban pynkhlaiñ ïa ka ilekshon MDC.
Na ka liang u Bah Prestone Tynsong ruh u la pynpaw ba um kwah ban buh sharud ïa u Bah Kansing Lynshiang lem bad ka kynhun jong u lada jia ba rung noh u Bah Banteidor Lyngdoh uba dei u MLA ka PDF, hynrei kin ïatreilang ban wanrah ïa ka jingjop ha kane ka ilekshon ban sa wan.
Ki khubor ki ïathuh ba ha kine ki sngi u Bah Kansing Lynshiang ryngkat ki nongkyrshan jong u, ki la dep ïakynduh kyrpang ïa u Bah Prestone ban ïakren na ka bynta ban pynkhlaiñ ïa ka seng NPP hadien ba ki la pdiang ïa u Bah Banteidor Lyngdoh sha ka NPP.
Ha kine ki sngi u Bah Prestone u la pynpaw ba ka jingkylla ha ka saiñpyrthei kan long ha ka 6 tarik haduh 8 tarik Jymmang 2023 namar kin don ki seng saiñpyrthei kin wan ban pynïasoh noh bad ka NPP, hynrei um shym la pynpaw kyrteng ïa kita ki MLA.
La sngewthuh ba ym dei tang ki MLA ka PDF ki ban rung sha ka NPP, hynrei kin don lang ruh kiwei ki seng saiñpyrthei ban ïasoh noh bad ka NPP na bynta ban pynkhlaiñ ïa kane ka seng kaba la bat ïa ka bor synshar ha ka jylla.
Haba pyrshang ban ïakren bad u Bah Kansing um pat kwah ban ong eiei ïa mynta, hynrei un ap haduh ban da ïohi ba u MLA ka thaiñ un rung sha ka seng NPP.
