Shillong, Ïaïong 27 (UNI):
Ka Syngkhong Rympei Thymmai (SRT), kaba dei ka kynhun jong kiba shim ïa ka jait ka kynja na u kpa ha ka jaka jong ka kmie, ka la byrngem ban leit sha ïingbishar pyrshah ïa ka Khasi Hills Autonomous District Council (KHADC) lada ka Council kam pynkylla ïa ka hukum ban khang ïa ka jingai syrnod Scheduled Tribe (ST) sha kito kiba shim jait na u kpa.
Ka SRT, kaba kam ba ka don palat 20,000 ngut ki dkhot ha jylla bad shabar, ka la ong ba ki la don bun kiba la duh noh ïa ka syrnod ST tang namar ba ki shim jait na u kpa.
“Ha ki saw-san snem ba la leit noh, ki la don bun kiba khlem ïoh ïa ka syrnod Scheduled Tribe na ka daw ba ki la shim jait na u kpa. Ka shlem treikam jong u Deputy Commissioner ka shu buh sharud ïa ki kot ki sla jong kiba pan syrnod Scheduled Tribe shisien ba la sngewthuh ba ki nongpan ki dei kiba la shim jait na u kpa,” la ong u President ka SRT, u Bah Teibor Khongjee.
U Bah Khongjee u la ong ba ka jingbym ïoh ïa ki syrnod ka dei namar ka aiñ Khasi Social Custom of Lineage Act, 1997 ba la pyntreikam da ka KHADC.
“Haba ngi la buddien ïa katei ka kam, ka tnat Social Welfare jong ka sorkar jylla ha u snem 2020 ka la pynmih ïa ka hukum sha ki Deputy Commissioner ka East bad West Khasi Hills District ha kaba la ong ba ka Lineage Act kam khang satia ban ai syrnod Scheduled Tribe wat lada kiba pan syrnod ki dei kiba shim jait na u kpa,” la ong u Bah Khongjee.
Hynrei, wat la ka la don katei ka hukum, u Bah Khongjee u la ong ba ki shlem treikam jong ki Deputy Commissioner ki dang pynsangeh beit ban ai syrnod Scheduled Tribe sha kito kiba shim jait kpa. “Lada ym lah ban weng ïa kane ka jingeh, ngin ym don lad da kumwei pat lait noh sa tang ban leit sha ïingbishar,” u la ong.
U Bah Khongjee u la ïathuh ba ka SRT ka la dep pyntip sha u Myntri Rangbah Conrad K Sangma halor katei ka mat bad ka la kyntu ïa u ba un tuklar khnang ba kan ym don jingeh ban ïoh ïa kitei ki syrnod.
