Shillong, Ïaïong 27:
Ka Khasi Students’ Union (KSU) ka la kynnoh ba ki shipai Border Security Force (BSF) kiba dei ban don ha ki jaka khappud, ki la shong be-aiñ pynban ha ïew Amlarem bad wat ban pyndik ïa ki paidbah nongleit nongwan.
Ha kaba ïadei bad kane ka jingdon jong ki BSF ha ïew Amlarem, na ka liang ka KSU West Jaiñtia Hills District Unit, ha ka Sngi Palei ka la leit ban ïakynduh ïa u Symbud Myntri Rangbah ka Jylla u Bah Prestone Tynsong bad uba khmih ruh ïa ka tnat Kam Pohïing ban dawa ba dei ban weng noh mardor ïa ki BSF na kane ka jaka, kaba long hapdeng shnong bad jngai na khappud bad ka Bangladesh.
Ka KSU ka la kyntu ruh ïa u Bah Prestone ba un tuklar lem halor kane ka kam, kaba la ktah shi katdei eh ïa ki paidbah nongshong shnong bad khamtam kito kiba leit ïew leit hat kiba ju shah pyndik man ka por bad wat ban shah knieh ruh ki mar ki mata ba ki wan thied ha kine ki BSF kiba pynkam ba ki dei ki mar be-aiñ.
Haba kren sha ki lad pathai khubor hadien ba la dep ban ïakynduh ïa u Bah Prestone, u President ka KSU West Jaiñtia Hills District Unit, Samla Laitphar Syngkrem, u la ong na ka liang u Bah Prestone mar mar u la hukum ïa u DC ka West Jaiñtia Hills ba un tohkit bad ban khot jingïalang bad ban weng noh mardor ïa ki BSF ba shong be-aiñ hapoh ka ïew Amlarem.
Nangta u samla Laitphar u la ong, kumba ka long ki BSF ba don ha kato ka jaka, ki ju pyndik ïa ka leit ka wan jong u paidbah, da ki leit sha ïew sha hat, sha sor Jowai bad ynda ki la wan, ki BSF ki la khynra ïa ki mar ki mata bad ki knieh bad rah sha ka ktem sah jong ki, bad kheiñ ba kine ki mar ki dei kiba be-aiñ.
“Ngi pynrem jur ïa kane ka jingleh jong ki shipai BSF namar ha ka jingshisha kum ki nongïada ïa u pud u sam, ki dei ban don ha ki jaka khappud. Hynrei kaba lyngngoh balei ki don sha ki ïew ki hat, ki shnong ki thaw bad pynlong ïa ka jingtalasi be-aiñ ïa ki mar ki mata jong ki trai shnong ka Amlarem bad ki shnong ba marjan,” la ong u samla Laitphar.
Nalor kata, une u nongïalam ka KSU u la pyntip ba kine ki shipai BSF ki la don mynta ha Amlarem la kumba hynriew bnai eiei. Ha shwa kane, ka seng ka la dep ruh ban ai da ka jingujor sha u Deputy Commissioner bad SDO, hynrei kim shym la leh eiei ïa kane ka kam. Dei halor kane, ba ka seng ka la hap wan ïakren syndon noh ïa u Symbud Myntri Rangbah ba un shimkhia halor kane ka kam.
Ha kajuh ka por, u samla Laitphar u la ong ba ka seng ka la maham lypa pat ba lada ka Sorkar kam lah ban leh eiei halor kane ka jingeh ki paidbah, kan nym don lynti pat da kumwei, hynrei ban shim da ka rai ba tyngeh.
