Shillong, Ïaïong 27:
Ka National Hynñiewtrep People Federation (NHPF) ha ka Sngi Palei ka 27 tarik u Ïaïong 2023, ka la leit ban ujor da ka ejahar pyrshah ïa ka Rumi Chowdhury kaba napoh ka jylla Assam halor ka jingthok bad ka pynbieit pisa ïa ki briew napoh kane ka jylla.
Haba kren sha ki lad pathai khubor hadien ba la wan ban ïakynduh ïa u Superintendent of Police (SP) ka East Khasi Hills District, u Bah Sylvester Nongtnger, IPS, u President ka NHPF, u Bah Andreas Nongkynrih u la ïathuh ba ka Rumi Chowdhury lem bad uwei u rangbah ba la tip kyrteng kum u Rajib napoh ka jylla Assam ki la thok bad pynbieit pisa ïa ki paidbah da kaba phah ban thep T.1 lak na ka bynta ban ïoh T.2 lak.
“Ka jingwan jong ka seng hapoh kane ka ophis u SP ka long ban ujor pyrshah ïa ka Rumi Chowdhury kaba dei na ka thaiñ Assam bad kiba bun nangne ki paradoh parasnam Khasi ki jong ngi, ki la ngat bun ha ki liang ban shah thok ha ka pisa,” la ong u Bah Nongkynrih.
U Bah Andreas u la ïathuh ruh ba kitei ki briew na ka jylla Assam ki lah pynbieit ïa ki paidbah ka jylla lyngba ki rynsan lad pathai kum ka Facebook bad ki la bthah ïa ki paidbah ban thep pisa T.1 lak ba kin ïoh biang T.3 haduh T.5 lak bad lada ki ai T.5 lak kin ïoh T.15 lak.
“Kum ka seng ngi kyntu bad ngi maham ruh ïa ki para doh ki para snam ki jong ngi kiba dei ki Khasi ba kim bit ban shu shah pynbieit kulmar ha ki briew shisngi arsngi lyngba ki rynsan Social Media,” la ong u Bah Nongkynrih.
Nalor kata, u Bah Nongkynrih u la ong ba kum kine ki jingjia shah thok pisa jong ki paidbah kam dei kaba dang shu jia mynta, hynrei ka dei ka jingjia kaba la ju jia teng ha ki por kiba mynshwa. Ki paidbah ki ju shah thok pisa bad wat la ki ïoh kham bun ka pisa, hynrei ki ïoh pat da kaba thok (pisa) ka bym ïaid satia ha ki bank.
Namar kata, ka seng ka buh ruh ka jingkyrpad ïa ki paidbah ba lada ki mad ïa kum kitei ki jingshah thok pisa ki dei ban mih shakhmat khnang ba ka seng kan lah ban ïaid shakhmat ban ïoh rat dyngkhong ïa kane ka jingsniew.
Shuh shuh u Bah Nongkynrih u la ïathuh ruh ba katkum ka jingïoh jingtip ka jong u ki la don da palat hajar ngut ki paidbah napoh ka jylla khamtam ki Khasi kiba la ngop ha kane ka jingshah thok pisa bad kane ka la sdang naduh ka por ba don ka jingkhangdam.
