Shillong, Ïaïong 28:
Ka tnat ka koit ka khiah jong ka sorkar jylla ha ka Sngi Thohdieng ka la pyntip ba ki don sa 17 ngut ki nongshong shnong kiba dang don ïa u khñiang jingpang COVID-19.
Kine ki 17 ngut ki kynthup ïa 10 ngut na West Garo Hills, 5 ngut na East Khasi Hills bad 2 ngut na West Jaiñtia Hills. Napdeng kine, 4 ngut ki don ha ki Hospital ban shah sumar. Na kine ki 17 ngut, kiba ïoh thymmai mynta ka sngi ki long 8 ngut katba kiba la koit ki don ar ngut.
Nalorkata, ka tnat ka koit ka khiah ka la pyntip ba u la don uwei u nongpang uba la khlad ha West Garo Hills na katei ka jingpang.
Naduh ba sdang ka jingpang COVID-19, ki la don 96,845 ngut kiba la ïoh ïa kane ka jingpang ha kaba kiba la khlad ki long 1,626 ngut katba 95,202 ngut ki la koit. Nalorkata, naduh ba sdang bad haduh mynta, la dep ban peit bniah ïa ki nongmuna jong ki 14,39,422 ngut.
