Tura, Ïaïong 28:
U Myntri Rangbah ka jylla, u Conrad K Sangma, ha ka Sngi Thohdieng u la ong ba ka sorkar ka la pynkhlaiñ ïa ka kamai ka kajih jong ki kynthei lyngba ki Self-Help Group (SHG).
Ïa kane, u Conrad u la kren ha ka National Seminar halor ka phang “Representation of Women of North East India in Multi – Disciplinary Discourse” ha Don Bosco College, Tura.
Ha kane ka sngi, la don ki riewshemphang na kylleng ka Ri kiba la wan ai ïa ki jingthoh ki jong ki halor katei ka phang. La don lang ruh u Myntri ka tnat pule puthi, u Rakkam A Sangma bad kiwei.
U Conrad u la ïathuh ruh halor ki jingeh ba ki longkmie ki ïakynduh namar ka jingïoh khun iwei hadien iwei khlem don ka jingpynjlan. U la ai nuksa ba ka longkmie ba dang don 23 snem ka rta, ka ïoh palat san ngut ki khun namar ka jingbym don ka jingpynjlan ha ka jingïoh khun.
“Namarkata, ngi la wanrah da ka Safe Motherhood Programme ban peit ïa ka koit ka khiah jong ki longkmie kiba armet. Ngi la wanrah ruh ïa ka skhim kaba pynkhlaiñ ïa ka kamai ka kajih jong ki longkmie lyngba ki lad bapher bapher da ka jingïatreilang ha ki Self-Help Group,” la ong u Conrad.
U la ïathuh ruh ba ka Meghalaya ka dei tang napdeng khyndiat eh ki jylla ha ka Ri ha kaba 95% na ki kynthei ha ki jaka nongkyndong ki ïadon bynta bad ki SGH. U la ong ba ki don palat 4 lak ngut ki kynthei kiba don ha ki SHG ha ka jylla haba ïanujor bad ki 35,000 ngut hashwa jong u snem 2018.
Shuh shuh u la ong ba ka sorkar ka trei da ka jingmut kaba skhem ban ai ïa ki lad kamai kajih ïa ki kynthei. U la ong ruh ba ki don bun ki jingeh kiba ktah ïa ki longkmie bad ka sorkar ka dang ïaleh ban weng ïa kita ki jingeh.
Na ka liang u Rakkam u la kren halor ka jingnoh synñiang jong ki kynthei ha ki liang bapher-bapher. U la kyntu ïa ki kynthei ba kin bteng ban ïakhun pyrshah ïa ki jingeh bad ban long kiba kloi ban noh synñiang sha ka imlang-sahlang.
